Sportty damytý dıreksııasynyń baspasóz qyzmeti málim etkendeı, Álem kýboginiń alǵashqy kúninde 1000 metr qashyqtyqta jarysýda el qorjynyna altyn júlde salǵan Alına Daýranova halyqaralyq týrnırdiń sońǵy kúninde de Ánuranymyzdy shyrqatty. Bir shaqyrymǵa jarysýda ol 1:22.10 sekýnd nátıjemen altynnan alqa taqqan bolsa, 500 metrge júgirýde de aldyna jan salmady. Alına bul qashyqtyqty 40,27 sekýnd ishinde baǵyndyrdy. Odan keıingi satyǵa nıderlandtyq Pen Hersman men ıtalııalyq Serena Perger jaıǵasty.
Al jastar men eresekter arasyndaǵy ótpeli neo-eresekter deńgeıindegi 500 metrde Altaı Járdembekuly kúmis júldeger atandy. Altaı on kún buryn Qazaqstan kýbogi kezeńinde 1500 metrde jeńiske jetken bolatyn. Osy baǵdarlamadaǵy taǵy bir otandasymyz Maqsat Muqaev úzdik bestiktiń qatarynan tabyldy.
Al jastar arasyndaǵy 1500 metrge jarysýda baq synaǵan Nuraly Aqjolǵa sál sáttilik jetispedi. Qazaqstandyq sportshy qola júlde úshin talasta Nıderland ókilinen jarty sekýnd qalyp qoıyp, 4-orynnan kórindi. Bul saıysta Qazaqstannyń taǵy bir ókili Roman Bınozarov 7-satyǵa turaqtady. Sondaı-aq 3000 metrge jarysýda Nuraly Aqjol qola júldeger atandy. Al myń metrde erler arasynda Nıkıta Vajenın kúmis júldeni moınyna ildi. Ol tek japonııalyq Issa Gýndjıden 2 sekýndtaı qalyp qoıdy.
Aıta keteıik, jastar arasyndaǵy Álem kýboginiń ekinshi kezeńi 3-4 jeltoqsanda osy Seınıaıokı qalasynda ótedi. Sportshylar úshinshi kezeńde Germanııanyń Insell qalasynda synǵa túsedi. Bul kezeń keler jyldyń 4-5 aqpany kúnderine josparlanǵan. Ári qaraı 10-12 aqpanda dál sol Insell qalasynda jastar arasyndaǵy Álem chempıonaty ótedi.
