«Ekibastuz qalasynda jylý berýdi qalpyna keltirý jumystaryn jalǵastyrý kerek. Apatqa sebep bolǵan barlyq máseleni tez arada sheshý qajet», dedi Úkimet basshysy.
Sondaı-aq Energetıka mınıstrligi men Indýstrııa mınıstrligi birlese otyryp, «Ekibastuzjylýenergo» mekemesindegi tehnologııalyq erejelerdi buzýǵa qatysty tekserý júrgizýdi tapsyrdy.
«Qys bastalmaı jatyp, osyndaı tótenshe jaǵdaı oryn alyp otyr. Barlyq ákim budan qorytyndy shyǵarýy tıis. Energetıka jáne ındýstrııa mınıstrlikteri ákimdiktermen birlesip, óńirlerdegi energetıkalyq obektilerge tolyqtaı tehnıkalyq aýdıt júrgizip, Úkimetke tıisti aqparatty engizsin. Júrgizilgen jóndeý jumystarynyń sapasyn tekserý qajet», dedi Á.Smaıylov.
Premer-Mınıstrdiń aıtýynsha «apat qaýpi» joǵary obektiler boıynsha jabdyqtar men ınfraqurylymdarǵa erekshe nazar aýdarý qajet.
«Barlyq jylý jáne energııa júıeleriniń qaýipsiz ári úzdiksiz jumysyn qamtamasyz etý úshin osy obektilerdiń menshik ıelerimen jumys júrgizý kerek. Ulttyq ekonomıka, energetıka jáne ındýstrııa mınıstrlikteri ákimdiktermen birlesip, «Tarıfti ınvestısııaǵa aıyrbastaý» baǵdarlamasy aıasynda kommýnaldyq kásiporyndardan kelip túsetin árbir ótinimdi muqııat zertteýi tıis. Turǵyn úı-kommýnaldyq sharýashylyǵynyń ınfraqurylymyn jańǵyrtýǵa jáne jóndeýge bólinetin qarajattyń naqty, maqsatty jumsalýyn qatań baqylaýǵa alý kerek. Ákimder jylý berý maýsymyn turaqty jeke baqylaýda ustasyn», dep tolyqtyrdy Úkimet basshysy.
