Kelissózge deıin Elıseı saraıynda resmı qarsy alý rásimi ótti. Kezdesý barysynda Qasym-Jomart Toqaev Fransııaǵa resmı saparmen kelýge shaqyrǵany jáne Qazaqstan Prezıdenti laýazymyna qaıta saılanýyna oraı quttyqtaǵany úshin Emmanıýel Makronǵa alǵys aıtty. Memleket basshysy bul sapar eki el arasyndaǵy strategııalyq seriktestikti nyǵaıtyp, qarym-qatynasty jańa deńgeıge kóterýge zor múmkindik beretinin atap ótti.
Fransııa 2005 jyldan beri Qazaqstan ekonomıkasyna jalpy kólemi 17 mıllıard dollar ınvestısııa quıyp, eń iri bes ınvestor eldiń qataryna kirdi. Sońǵy 9 aıda ekijaqty taýar aınalymy 2,5 mıllıard dollarǵa jetti. Bul byltyrǵy osy kezeńmen salystyrǵanda 6,1 paıyzǵa joǵary. Fransııanyń Ortalyq Azııa elderimen jasaǵan saýda-sattyǵynyń 90 paıyzy Qazaqstanǵa tıesili. Eki memleket energetıka, taý-ken óndirisi, jeńil ónerkásip, qurylys, aeroǵarysh, mashına jasaý, densaýlyq saqtaý jáne tamaq ónerkásibi salalarynda tıimdi jobalardy birlesip júzege asyryp keledi. Qazaqstanda 170-ten astam fransııalyq kompanııa men birlesken kásiporyn jumys isteıdi. Olardyń arasynda ekonomıkamyzdyń jetekshi ınvestorlary sanalatyn Total Energies, Air Liquide, Airbus, Alstom, Orano jáne Danone sekildi kompanııalar bar. Byltyr elderimiz Saýda-ekonomıkalyq jáne ınvestısııalyq yntymaqtastyqtyń 2030 jylǵa deıingi jol kartasyn bekitti.
Kelissóz barysynda Qasym-Jomart Toqaev elimizde júrgizilip jatqan saıası jáne ekonomıkalyq jańǵyrý úderisi jóninde aıtty. О́z kezeginde Emmanıýel Makron Qazaqstan Fransııanyń strategııalyq seriktesi ekenin atap ótti. Eki el arasynda saýda-ekonomıkalyq yntymaqtastyq qarqyndy damyp keledi. Energetıka salasynda birlesken jobalar júzege asyrylyp jatyr. Eýropalyq Odaq Qazaqstandaǵy túrli jobalarǵa ınvestısııa salyp keledi. Sonymen qatar Emmanıýel Makron 2024 jyly Qazaqstanda fransýz tilinde oqytatyn jańa mektepter ashylatynyn aıtty. Fransııa Prezıdenti Qazaqstanda júrgizilip jatqan reformalarǵa qoldaý bildirdi.
Taraptar eki eldiń bilim jáne mádenıet salalaryndaǵy baılanystaryn nyǵaıtý jóninde pikir almasyp, halyqaralyq kún tártibindegi ózekti máselelerdi jáne Ortalyq Azııa óńirindegi jaǵdaıdy talqylady.
Kezdesý sońynda Qasym-Jomart Toqaev Emmanıýel Makrondy Qazaqstanǵa saparmen kelýge shaqyrdy.
