Chempıonattyń ashylý saltanatyna Astana qalasy Dene shynyqtyrý jáne sport basqarmasynyń buqaralyq sport bóliminiń basshysy Azamat Aǵzamov, №2 Balalar men jasóspirimderdiń mamandandyrylǵan sport mektebiniń basshysy Baýyrjan Saharbaev, short-trekten bas jattyqtyrýshy, QR Eńbek sińirgen qaıratker Mádiǵalı Qarsybekov, short-trekten el quramasynyń bas jattyqtyrýshysy Nurbergen Jumaǵazıev qatysty.
Uıymdastyrýshylardyń aıtýynsha, jarysqa elimizdiń Kókshetaý, Qostanaı, Qyzylorda, Soltústik Qazaqstan oblysy jáne Astana qalasynan 163 qatysýshy tirkelgen. Olar eki kún boıy baq synaıtyn bolady.
«Balalar jyly aıasynda ótkizilip otyrǵan búgingi chempıonatqa 2009 jyly týǵan jáne odan úlken jastaǵy jetkinshekter qatysyp jatyr. Jarystyń maqsaty – qysqy sport túrlerin, onyń ishinde short-trekti damytý, sportty nasıhattaý. Elimizdiń bes óńirinen kelgen balalar eki kún boıy naǵyz úzdikterdi anyqtaıdy», dedi Baýyrjan Saharbaev.
Sonymen qatar jarysqa halyqaralyq dárejedegi sport sheberi, Álem kýbogy men álem birinshilikteriniń júldegeri, jaqynda ǵana short-trekten ótken álem kýbogy kezeńinde kúmis júlde alǵan Abzal Ájiǵalıev qurmetti qonaq retinde shaqyrylǵan.
«Short-trek elimizde jańadan damyp kele jatqan sport túri dese de bolady. Mundaı jarystar óte qyzyqty ótedi. О́ıtkeni bul jetkinshekterdiń alǵashqy belesteri, este qalatyn jarystary bolmaq. Olar úshin mundaı týrnırler jańa tájirıbe, jańa múmkindik syılaıdy. Muz aıdynynda óner kórsetetin kishkentaı sportshylarymyzǵa sáttilik tileımin. Jetkinshekterge aıtar keńesim, aınalysyp júrgen bul sport túrleri, eń aldymen, ózderine unaýy kerek. Sportqa degen mahabbat bolǵanda ǵana úlken nátıjelerge qol jetkize alady. Osy short-trekpen aınalysyp kele jatqanyma 18 jyl boldy. Qysqy sporttyń osy túrin damytýǵa óz úlesimdi qosqym keledi. Búgingi jas izbasarlarymyz bolashaqta Olımpıada jalaýyn jelbiretedi degen úmittemin», deıdi Abzal Ájiǵalıev.
Aıta ketsek, atalǵan chempıonatta aldaǵy qysqy maýsymǵa úzdik sportshylardan turatyn Astana qalasynyń qurama komandasy jasaqtalady. Jeńimpazdar ár jas tobyndaǵy jáne ár qashyqtyq boıynsha jeke birinshilikterde anyqtalyp, dıplomdarmen, medaldarmen marapattalady.
