Qoǵam • 30 Qarasha, 2022

Eriktiniń eńbegi eren

El jastary qazaqtyń qanynda bar kisiliktiń kórinisin Ekibastuzda kórsetti. Qaqaǵan aıazdyń qyspaǵynda qalǵan jurtshylyqqa eriktiler kómekke kelip, jalǵyz basty qarııalar men kópbalaly otbasylarǵa, múmkindigi shekteýli jandarǵa járdemdesti. Kúni-túni kóshede jantalasyp qubyr jamap júrgen jumyskerlerge ystyq tamaq pen shaı aparyp, olardyń tońyp qalmaýyn qadaǵalady.

Murat QAPANULY

Amanat partııasy «Jastar Rýhy» jastar qanatynyń Pavlodar men Astana qalalaryndaǵy bólimshelerinen jalpy sany 100-den astam belsendi jeksenbiden beri Ekibastuzǵa aǵyla bastady. Olar jylýsyz páterlerde tońyp otyrǵan jurtty jyly sózderimen demep, gýmanıtarlyq kómekpen ilesip jetken jylytqyshtardy, jyly kórpelerdi taratty.

Pavlodar qalalyq máslıhatynyń depýtaty, óńirdegi «Jastar rýhy» jastar qanatynyń tóraǵasy Sanıra Júsipova oblys ortalyǵynan 50 erikti kelgenin jetkizdi.

– Mine, búgin – úshinshi kún, eriktiler kúni-túni talmaı kómek kórsetip jatyr. Kómek kórsetý shtabynyń jumysyn úılestirip, kelip túsken ótinishter boıynsha turǵyndarǵa járdem jasap jatqan jaıymyz bar. Jylýsyz otyrǵan kóppáterli jáne jer úılerdi aralap, jalǵyz basty qart adamdardy, múgedekterdi, kópbalaly otbasylardy esepke aldyq. Olardyń qajettiligi úshin 1 myńǵa jýyq elektr jylytqysh aparyp berdik. Buǵan qosa termostar, jyly kórpeler jetkizdik. Bul quraldardy bizdiń partııamyzdyń óńirdegi fılıaldarynyń músheleri óz qarajattaryna satyp aldy. Úıinde tamaq isteýge múmkindigi joq jalǵyz basty jandarǵa ystyq tamaqty turaqty jetkizip turmyz. Shahardaǵy áleýmettik qyzmetkerlermen tize qosyp, qaı úılerde ystyq sý nemese elektr jaryǵy joq ekenin anyqtap, tıisti mekemelerge habarlap otyramyz. Qaladaǵy halyqty tezirek qolaıly ómirge oraltý úshin apat saldarymen táýlik boıy jantalasyp jatqan jóndeý brıgadalarynyń jumyskerlerin de nazarymyzdan tys qaldyrmadyq. Olarǵa mezgil saıyn ystyq tamaq pen shaı tasyp jatyrmyz. Kópshilik bizdiń eńbegimizdi baǵalap, alǵys aıtqanyn kórgende óz isimizge degen yntamyz artady. Úlken ájeler bizdi kórse, «aınalaıyn» dep alǵys aıtady. Bul bizdiń eriktilerdiń durys baǵytta jumys istep jatqanyn kórsetse kerek. Qalada tehnogendik sıpattaǵy tótenshe jaǵdaı rejimi tolyq alynyp tastalmaıynsha biz Ekibastuzdy tastap ketpeımiz! – deıdi Sanıra Júsipova.

Muqtaj jandardyń tilegin oryndap júrgenderdiń arasynda Kámıla Baıramova da bar. Ol kezinde Áýlıekól, Maqtaaral aýdandary men Arys qalasynda zardap shekkenderge kómek kórsetken eriktilerdiń tájirıbesi mol ekenin aıtty. Mundaı qıyn sátte judyryqtaı jumylý árbir azamattyń qasıetti boryshy bolýǵa tıis dep sanaıdy. Al taǵy bir belsendi Arslanbek Maǵzum turǵyndar sýyq páterlerinde qamalyp otyra bermeı, kómek suraǵany durys dep esepteıdi. Eriktiler shtabyna kelip túsken ótinishter barlyǵyna bólinip, volonterler jyly kıimderdi, aýyz sý jáne alǵashqy qajettiliktegi ózge de taýarlardy mekenjaılarǵa jedel jetkizýge tyrysýda.

Pavlodar oblysy,

Ekibastuz qalasy