Aımaqtar • 30 Qarasha, 2022

Ekibastuz eleń-alańy basyldy

95 ret kórsetildi

Ekibastuzda jaǵdaı turaqtaldy. Shaharda senbiden jeksenbige qaraǵan túni oryn alǵan apattyń saldary joıylyp, jylý magıstralyndaǵy úlken aqaýlar tolyǵymen retteldi. Qala boıynsha keshe keshki saǵat 22.00-de qalpyna keltirý ju­mys­ta­ry márege taıap, jylýdan tolyq ajyrap turǵan 17 úıdiń qu­byr­laryna jylý jiberýge daıyndyq bastaldy.

Úkimet basshysynyń tapsyrmasy boıynsha Premer-Mınıstrdiń orynbasary – Saýda jáne ıntegrasııa mınıstri Serik Jumanǵarın men Tótenshe jaǵdaılar mınıstri Iýrıı Ilın, Energetıka vıse-mınıstri Jandos Nurmaǵanbetov kenshiler shaharyndaǵy jaǵdaımen tanysyp, ahýaldy baǵalaý úshin seısenbi kúni keshkilik Ekibas­tuz­ǵa jetti. Úkimet múshe­leri jáne Pavlodar oblysy áki­miniń mindetin atqarýshy Ábil­qaıyr Sqaqov «Ortalyq-Azııa Elektroenergetıkalyq Kor­porasııasy» AQ aksıonerleri, «Ekibastuz jylý-energo» JShS quryltaıshylarynyń qaty­sýy­men jedel shtabtyń otyrysyn ótkizip, túnde jóndeý júrip jatqan ýchaskelerdi aralady. Aıazda tońyp otyrǵan turǵyndardyń jaǵdaıymen tanysyp, aryz-shaǵymdaryn tyńdady. Serik Maqashuly halyqty sabyr­lyqqa shaqyryp, keshe, ıaǵnı 30 qarasha kúni keshkilik ajy­ratylǵan úılerdiń barlyǵy toly­ǵymen jylý jelisine qosy­la­tynyn jetkizdi.

30 qarasha kúni saǵat 8.00-de Ekibastuzdaǵy tótenshe jaǵ­daıdy joıý jónindegi jedel shtab­tyń otyrysynda qalanyń jylý jelilerindegi jaǵdaı men temperatýralyq rejimdi qalpyna keltirý boıynsha qabyldanyp jatqan sharalar talqylandy. Jylý magıstralindegi jarylǵan eki negizgi jerdi qalpyna keltirý jáne Máshhúr Júsip kóshesindegi 17 kóppáterli úıdi jylytý júıelerine qosý josparlanyp otyrǵany aıtyldy. Saǵat 9.00-den qalanyń áleýmettik nysandary tekserile bastady. Úkimet pen jedel shtab músheleri Ekibastuz qalalyq aýrýhanasynda, onyń qabyldaý bóliminde, perzenthanada boldy. Medısınalyq mekemelerdegi temperatýra 24 gradýs jylylyqty kórsetti.

Al kúndizgi saǵat on birler shama­synda Pavlodar oblysy áki­mi­niń mindetin atqarýshy Ábil­qaıyr Sqaqov jýrnalıster aldy­na shyǵyp, búgin keshke deıin jaǵ­daı tolyq turaqtalatynyna sen­dirdi.

– Buǵan deıin Ekibastuz jylý-energo ortalyǵy normadan tys kóp sý joǵaltyp jatqanyn aıtqan bolatynbyz. Máshhúr Júsip kóshesindegi 17 úı sol úshin jeliden ajyratylǵan-dy. Biz bul magıstraldaǵy qubyrlardan eki sańylaýdy taptyq. Sý sol jerden ketip jatyr. Ony bir­den ańǵarmaǵanymyz, ystyq sý jer­diń betine shyqpaǵan. Qazir ol jerde apat saldaryn joıý bo­ıynsha jumystar qyzý júrgizi­lýde. Saǵat 15.00-ge deıin jumys­tar aıaqtalyp, keshke deıin jylý­syz turǵan úıler júıege qosy­lady. Endi júıe men jylý orta­­ly­ǵynyń jumysyn úılestirý ǵana tur. Keshke deıin barlyq máse­le sheshilýge tıis, – dedi oblys ákimi.

Serik Jumanǵarın Ekibastuz qalasynyń ahýaly jóninde oqı­ǵa ornynan beınekonferensııa ótkizdi.

– Apat saldarynan alǵashqy kúnderi shahar boıynsha jalpy sany 149 kóppáterli jáne 114 jer úı, 15 áleýmettik nysan ajyratylǵany belgili. Qa­zir qalyp turǵany – 17 úı. Búgin tańerteń shaharda jaǵdaı turaqtalǵanyn kórip otyrmyz. Qazirgi ýaqytta barlyq jumys Máshhúr Júsip kóshesinde júrip jatyr, ol úshin 39 brıgada, onyń ishinde 214 adam basqa qalalardan da jınaldy. Keshe túnde páter ıeleri óz kúshterimen qubyrlardy jibitip, jóndeýshilerge kómek­tesip jatqanyn kórdim. Jylýdan ajyratylǵan úıler men birqatar áleýmettik nysandy araladyq. 1 myńnan astam azamattan shaǵym túsken eken. Jylýmen qamtýshy kompanııa barlyq shyǵyndy óz esebinen óteıdi, oǵan kúmándaryńyz bol­masyn. Qazirge deıin páter ishin­degi jylý radıatorlaryn aýysty­rý boıynsha 7 shaǵym túsip otyr. Apatty aýyzdyqtaý jumysta­rynyń 99 paıyzy aıaqtaldy. Páter ıelerine 5 myń­nan astam jylytqysh taratylǵan eken. Olardy qaıtaryp berýdiń qajeti joq, – dedi Serik Jumanǵarın.

Serik Maqashuly mundaı apattyq jaǵdaı Pavlodar oblysynda ǵana emes, buǵan deıin Petropavl qalasy men Shyǵys Qazaqstanda tirkelgenin, túptep kelgende elimizdegi jylý berý kásiporyndarynyń bar­ly­ǵynda jabdyqtarynyń tozý kór­setkishi baıqalǵanyn atap ótti. Prezıdenttiń tapsyr­ma­sy boıynsha jylý ener­gııasyn óndirýshilerdiń ınvestısııalyq baǵdarlamasy ázirlenedi. Onda jab­dyqtar men jelilerdi jańar­týǵa jumsalatyn shyǵynnyń kemi 20 paıyzyn kásiporyn kóte­rýge tıis degen talap engi­ziledi. Investısııalyq baǵ­darlama tek tarıf esebinen qu­ralmaýy kerek, sebebi monopolıster turǵyndardyń qalta­syna salmaq salatyny sózsiz. Bıýdjet qandaı kómek kórsete alady? Osy máselelerdiń barly­ǵy tarazylanady. Úkimet bul baǵdarlamany barynsha jedel qabyldaýǵa múddeli. Al Energetıka mınıstrligi Atomdyq jáne energetıkalyq qadaǵalaý men baqylaý komıtetiniń tóra­ǵasy Suńǵat Esimhanov bas­ta­ǵan mamandar juma kúnine deıin Ekibastuz jylý-energo orta­ly­ǵyndaǵy tergeýdiń qory­tyn­dysyn shyǵarýy kerek.

«Pavlodarenergo» AQ bas dırektorynyń mindetin atqarýshy Vadım Lesın kúnniń sýyqtyǵy 30 gradýsqa tómendegende jylý mekemesi jylý temperatýrasyn norma boıynsha 92 gradýsta ustap turýǵa tıis ekenin, alaıda apat kezinde bul kórsetkish «Ekibastuz jylý-energoda» 85-86 gradýs bolǵanyn jetkizdi. Osynyń saldarynan kóptegen úıde qysym tómendep ketkeni belgili. Apat­ty joıý jumystaryna qa­tys­qan qyzmetkerler men ju­mys­kerlerdiń eńbegi eleýsiz qal­maı­dy. Al apat kezinde jylýdan ajyratylǵan jáne qalypty jylý bolmaǵan páterler boıynsha jylý aqysy qaıta eseptelmek.

Qazir myńdaǵan páter elektr jylytqyshtar qosyp otyr­ǵan­dyq­tan, osy aıdyń nátı­jesinde jaryq úshin tóleıtin tólem­aqylary ósip shyǵa keletini de aıqyn. Ábilqaıyr Sqaqov bul boıynsha másele jeke qara­latynyn aıtty. Apat kúnderi qala boıynsha elektr qýatyn tutyný birden 20 megavatqa ósken. «KEGOK» kompanııasy bul bo­ıynsha qosymsha qýattylyqtar bólip, kemshilik baıqalǵan aýdan­darda jóndeý jumystaryn júr­gizdi. Endi «Ortalyq-Azııa Elek­troenergetıkalyq Korpo­ra­sııa­sy» AQ sáýir aıyna deıin jylý ortalyǵynyń jumysyna to­lyq jaýapty bolady. Odan soń kásiporynnyń menshik ıesi bo­ıynsha máselesi sheshilýi kerek.

Qazirgi jaǵdaı durystalǵan soń Ekibastuz halqyn aldaǵy qystan aman-esen alyp shyǵý mindeti tur. Odan soń mundaı apattyń qaıtalanbaýy úshin memleket tarapynan sheshimdi talaptar men qadamdar qajet ekeni túsinikti. Mamandar tyǵyryqtan shyǵýdyń eki jolyn usynyp otyr. Birinshisi – «Ortalyq-Azııa Elektroenergetıkalyq Korporasııasy» mıllıardtap qarajat bólip, óndiris tehno­logııasy men jelilerdi tolyq ja­ńar­týy kerek. Ekinshi joly – memleket menshigine qaıtarý. «Pav­lodarenergo» AQ kásip­orynnyń aktıvterin bıyl shilde aıynda nólge baǵalap, ony tegin bere salýǵa daıar ekenin aıtqan. Osy aptada korporasııa basshysy Aleksandar Klebanov bul she­shimdi taǵy bir márte rastady. Sa­rapshylar stansa memleket balan­syna berilgen kúnniń ózinde de jaǵdaı birden ońalyp ketpeıdi, deıdi. Aıaqqa turǵyzý úshin ke­minde 3 jyl ýaqyt kerek. Al ja­ńartýǵa jumsalatyn qarajatty Ekibastuz qalasy túgili, oblystyq bıýdjet te taýyp bere almaıdy.

 

Pavlodar oblysy,

Ekibastuz qalasy

Sońǵy jańalyqtar

Demalys kúnderi aýa raıy qandaı bolady?

Aýa raıy • Búgin, 10:38

Uqsas jańalyqtar