Eýropadaǵy qaýipsizdik jáne yntymaqtastyq uıymyna (EQYU) qatysýshy elderdiń syrtqy saıası vedomstvolarynyń basshylary Lodz qalasynda (Polsha) EQYU Syrtqy ister mınıstrleri keńesiniń 29-shy otyrysyna qatysý jáne eýroatlantıkalyq pen eýrazııalyq keńistiktegi syn-qaterler men problemalardy uıymdastyrý úshin ózekti máselelerdi talqylaýǵa jınaldy.
Otyrys barysynda aǵymdaǵy jylǵy Uıym qyzmetiniń qorytyndylary, óńirlik qaýipsizdiktiń ózekti máseleleri, qarýly qaqtyǵystardyń aldyn alý jáne sheshý, radıkaldanýǵa, ekstremızmge jáne transulttyq qaterlerge qarsy kúres, aqparattyq jáne kommýnıkasııalyq tehnologııalar qaýipsizdigi salasyndaǵy yntymaqtastyq jáne t.b. máseleler talqylandy.
Qazaqstandyq delegasııany Premer-Mınıstrdiń orynbasary – Syrtqy ister mınıstri Muhtar Tileýberdi basqardy. Otyrysqa qatysýshylarǵa joldaýynda ol Prezıdent Qasym-Jomart Toqaevtyń «Ádil Qazaqstandy» qurýǵa jarııalaǵan baǵyty sheńberinde elimizdegi aýqymdy saıası jáne áleýmettik-ekonomıkalyq reformalar týraly aıtty. EQYU-ǵa qatysýshy 57 memlekettiń Syrtqy ister mınıstrleriniń nazary elimizdegi jýyrdaǵy prezıdenttik saılaýdyń qorytyndylaryna aýdaryldy, olar qazaqstandyqtardyń kópshiliginiń Memleket basshysynyń qaıta qurý baǵytyna senimdi qoldaý kórsetti.
M. Tileýberdi budan ári uıymnyń barlyq úsh ólshemine qatysty máseleler boıynsha Qazaqstannyń ustanymy men kózqarasyn baıandap, ınklıýzıvti dıalogty jalǵastyrýdyń jáne janjaldy jaǵdaılardy birlesip den qoıý jáne aldyn alý úshin EQYU-ǵa qatysýshy elderdiń úılestirilgen is-qımyldaryn júzege asyrýdyń mańyzdylyǵyna nazar aýdardy. Osy turǵyda EQYU keńistigindegi kelispeýshilikter dıplomatııalyq jolmen sheshilýi tıis ekendigi atap ótildi.
QR SIM basshysy Helsınkı qorytyndy aktisiniń, Parıj hartııasynyń jáne Astana deklarasııasynyń rýhyna sáıkes Eýro-Atlantıka men Eýrazııadaǵy senimdi qalpyna keltirý asa mańyzdy ekenin atap ótip, qazirgi qıyn-qystaý kezeńderde elder «qabyrǵalar men transheıalardy emes, joldar men kópirler salýy» tıis ekenin atap ótti.
Qazaqstan 1992 jyly EQYU múshesi boldy. 2010 jyly QR EQYU-ǵa tóraǵalyq etip, sol jyldyń jeltoqsan aıynda «Astana estelik deklarasııasy: qaýipsizdik qoǵamdastyǵyna qaraı» qujatyn qabyldaýmen aıaqtalǵan Uıymnyń Sammıtin ótkizdi.
