Úkimettiń jumys toby buqaralyq aqparat ókilderi úshin baspasóz máslıhatyn ótkizip, apatty joıý boıynsha qolǵa alynǵan jumystar jaıynda baıandady.
– Ekibastuz qalasy boıynsha qazirgi sátte jylýsyz qalyp otyrǵan 58 kópqabatty úı bar. Buǵan deıin № 5A shaǵyn aýdandaǵy jylý magıstralynda sońǵy jóndeý jumystary aıaqtaldy. Búginge deıin júıedegi teńgerimsizdik saldarynan jylý-energo ortalyǵy osy aýmaqtaǵy úılerge qosyla almaı keldi. Qazir jaǵdaı birtindep ońalyp keledi, №5 B jáne № 6 shaǵyn aýdandaryndaǵy ortalyq jylý jelilerine jylý jiberile bastady. Erteń №5 A aýdanyndaǵy birneshe kún boıy jylýsyz otyrǵan 17 úıdegi páterlerdi ortalyq jelige jalǵaý josparda tur. Biz jergilikti qalaquraýshy kásiporyndarmen sóılestik, jylýsyz turǵan 58 úıdiń árqaısysyna qajetti mamandar bekitiledi. Jylýdy, aýyz sýmen qamtýdy, káriz júıesin baqylap otyrady, – dedi R.Sklıar.
Energetıka mınıstrligi Atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimhanov bastaǵan mamandar jylý berý mekemesindegi tergeý jumystaryn aıaqtap qalypty. Tergeýdiń aldyn ala qorytyndylaryna súıensek, apat stansa qyzmetkerleriniń qate áreketterinen oryn alǵan. Qyzmetkerler jylý qysymyn kenetten birden kóterip, saldarynan onsyz da tozyp turǵan jylý qubyrlary birinen soń biri jarylǵan. Artynsha sýdyń ysyrap deńgeıi ósip, ortalyqtaǵy qazandyqtar toqtaǵan. Apat oryn alǵan 27 qarasha kúni shahar boıynsha – 43, al kelesi kúni 30 aqaý anyqtalǵan. Mundaı keshendi apat Ekibastuzda alǵash ret kezdesip otyr.
«Bul qorytyndylar tekserý tobynyń aldyn ala uıǵarymdary ekenin aıtqym keledi. Negizgi apattyń jylý toraptarynda bolǵanyna nazar aýdarý kerek. Qazandyqtar avtomatty túrde sóngen. Ekibastuz jylý-energo ortalyǵynyń qazirgi jaǵdaıy jaman emes. Maqsatymyz erteńnen bastap barlyq turǵyn úıdi aman-esen jylýǵa qosyp, úıler ishinde shyqqan aqaýlardy qalpyna keltirý. Kináli tulǵalardy jaýapkershilikke shaqyrý, jazalaý sharalarymen quqyq qorǵaý organdary aınalysady. Bizdiń shtabymyzdyń barlyq áleýeti qala turǵyndarynyń máselesin sheshýge jumyldyrylady. Búgin birneshe úıde bolyp, jurtshylyqtyń máselelerin tyńdadym. Úı ishindegi temperatýra nebári 10 gradýs jylylyqty kórsetip tur. Mundaı bolmaýy kerek», dedi R.Sklıar.
Energetıka vıse-mınıstri Jandos Nurmaǵambetov turǵyndardyń barlyq shyǵynyn «Ortalyq-Azııa elektrenergetıkalyq korporasııasy» AQ óteıtinin, qazirgi ýaqytta kelip túsken ótinishter boıynsha shyǵyn kólemi eseptelip jatqanyn eske saldy. Al Ekibastuzdaǵy JEO-ǵa jaqyn arada tehnıkalyq aýdıt júrgizilip, uzaq merzimdi jańartý baǵdarlamasy qabyldanbaq.
Pavlodar oblysy,
Ekibastuz qalasy
