Aımaqtar • 04 Jeltoqsan, 2022

Ekibastuzdaǵy barlyq úıdiń jertólesine jylý kirdi

Búgingi saǵat 20.00-degi jaǵdaı boıynsha Ekibastuzdaǵy jylý júıesinen ajyrap turǵan kópqabatty úılerdiń barlyǵynyń jertólesine jylý kirgizildi. Qazirgi kúni jóndeý brıgadalary 11 úı boıynsha páterlerdiń jylý radıtorlary men páter aralyq qubyrlardy aýystyryp jatyr, dep jazady Egemen.kz.

Murat QAPANULY

Bul týraly Ekibastuzdaǵy apatty qalpyna keltirý jónindegi jedel shtabtyń ókilderi ótkizgen baspasóz máslıhatynda aıtyldy.

- Qazir Ekibastuz JEO-dan shyǵatyn jylý jelilerindegi temperatýra 82-de 59 gradýsty kórsetip otyr. Apat saldarynan jylýdan ajyrap qalǵan barlyq úılerdiń jertólesine deıin jylý kirgizildi, jylý aınalymy qalpyna kele bastady. Jóndeý brıgadalary búginge deıin úılerdiń ishindegi 850 jylý batareıalaryn aıyrbastady. Tańerteń qolymyzda 2500 dana jylý batareıasy bolǵan. Sondyqtan páterleri jylýǵa endi qosyla bastaǵan 11 turǵyn úıge qoıatyn jylý radıatorlarymyz jetkilikti.

Pavlodar oblysy ákiminiń mindetin ýaqytsha atqarýshy Oleg Krýktyń aıtýynsha, ysyrap bolyp jatqan sý kólemi shamamen 360 tonna, kásiporyn buǵan qosymsha taǵy 350 tonnadaı joǵaltyp otyr.

- Kóp jumystar júrgizildi. О́kinishke qaraı keıbir úılerde PIK-ter tıisti sharalardy ýaqytyly atqarmaǵan. Sonyń saldarynan júıeler qatyp qalǵan. Qazirgi kúni Sátbaev kóshesi, 8 úı, Máshhúr Júsip kóshesi, 52 úı, Áýezov kóshesindegi №47, 46, 46A, Sheshembekov kóshesi, 19A úılerinde qıyndyqtar týyndaýda. Shtab jetekshisi, Úkimet basshysynyń birinshi orynbasary Roman Sklıardyń tapsyrmasymen ár úıge belgili bir kásiporyndar bekitildi. Álgi kásiporyndardyń basshylary qalpyna keltirý jumystarynyń basy-qasynda ózderi júr. Bul jaǵdaı barlyq zaqymdaný tolyq qalpyna keltirilgenshe saqtalady. Úılerdi jylýǵa qosý jaqyn ýaqytta aıaqtalady dep otyrmyz, - dedi ol.

Shtab ókilderi apatty joıý sharalaryna belsendi atsalysyp jatqan «SAEM» kompanııasyna, «Shyǵys» kenishi, MAES-1, MAES-2 stansalaryna, «Bozshakól» KBK-ǵa, «Bogatyr Kómir» jáne KEGOK kásiporyndarynyń basshylyǵyna, sondaı-aq óz jumysyn adal atqaryp júrgen PIK-terdiń ókilderine alǵys bildirdi.

Aıazda turǵyndar men jóndeý brıgadalaryna ystyq shaı men as-aýqat tasyp júrgen eriktilerdiń eńbegi de maqtaýǵa laıyq.

Qala basshysy Aıan Beısekınniń aıtýynsha, apattan zardap shekken turǵyndardyń barlyq shyǵynyn óteýdi «Ortalyq-Azııa Elektroenergetıkalyq Korporasııasy» AQ óz mindetine alyp otyr.

Atap óterligi, qalpyna keltirý, jóndeý jumystarynda paıdalanylyp jatqan qubyrlar men radıatorlar «Ortalyq-Azııa Elektroenergetıkalyq Korporasııasy» AQ-nyń jáne demeýshilerdiń esebinen satyp alynypty. Barlyq kópqabatty turǵyn úılerdiń jylý toraptary qalpyna kelgen soń jóndeý brıgadalary sýyq sý qubyrlaryn jibitýge jáne júıeleri qatyp jatqan 70 jeke úıdiń qubyrlaryn retteýge attanady.

Buǵan qosa OJP-52 nysanyna jáne ózge de magıstralderge qosylǵan birneshe áleýmettik nysannyń júıelerin durystaý kózdelip otyr.