Qyrǵyzstanda Eýrazııa ulttyq ýnıversıtetiniń fılıaly ashyldy

Onda EUÝ mamandardyń sapaly daıarlyǵyn qamtamasyz etip, halyqaralyq ǵylymı jáne bilim berý salasyndaǵy yntymaqtastyqty belsendi damytady. Ulttyq ýnıversıtet 2024 jyldyń sońyna deıin shetelde taǵy bir fılıal ashýdy josparlap otyr.

L.N.Gýmılev atyndaǵy Eýrazııa ulttyq ýnıversıtetiniń fılıaly Osh qalasynda quryldy. Onyń resmı ashylý rásimine EUÝ-niń ǵylym, kommersııalandyrý jáne ınternasıonaldandyrý jónindegi prorektory Janna Qurmanǵalıeva, Osh memlekettik ýnıversıtetiniń rektory Qudaıberdi Qojobekov, Qazaqstan Respýblıkasynyń Osh qalasyndaǵy konsýly Muhtar Káribaı, oqytýshylar men stýdentter qatysty.

«EUÝ fılıalynyń ashylýy bizdiń elder arasyndaǵy dostyq pen tatý kórshiliktiń, bilim jáne ǵylymmen qatar barlyq salada yntymaqtastyqty arttyrýǵa ózara umtylystyń arqasynda múmkin bolyp otyr. Kadrlardy joǵary sapada daıarlaý, nátıjeli ǵylym, básekege qabiletti patrıot jastar baýyrlas halyqtarymyzdyń, jalpy óńirdiń bolashaǵy úshin ýnıversıtetterdiń eleýli úlesi bolmaq. Fılıal Qazaqstan men Qyrǵyzstannyń eń daryndy stýdentteri men ǵalymdaryn tartady dep úmittenemin. Bul baǵytta EUÝ halyqaralyq bilim berý naryǵynda óziniń básekege qabilettiligin turaqty túrde arttyryp keledi. Bizdiń ýnıversıtet QS World University Ranking reıtınginde álemniń úzdik 300 joǵary oqý oryndarynyń qataryna kirip, 277 oryndy ıelendi. Jaqynda EUÝ zertteý ýnıversıteti mártebesi berildi. Bul óz kezeginde ǵylymı-akademııalyq kollaborasııa múmkindikterin keńeıtedi», dep atap ótti EUÝ prorektory Janna Qurmanǵalıeva.

Búginde EUÝ fılıalynda 30-ǵa jýyq stýdent bilim alýda. Olar aǵashqy eki kýrsty Osh qalasynda, keıingi eki jylda Qazaqstanda tańdaǵan kásipterin meńgeredi. Oqý baǵdarlamasy aıasynda qyrǵyz jastary qazaq tilin meńgerýde. Kelesi jyly «Qazaqstan tarıhy» pánin engizý josparda bar. Fılıalda joǵary kásibı bilim berýdiń eki baǵyty boıynsha mamandardy daıarlaý júrgiziledi: «aýdarma isi» jáne «orys tili men ádebıeti».

Aldaǵy ýaqytta jaratylystaný ǵylymy, fızıka jáne IT baǵytynda bilim berý baǵdarlamalarynyń sanyn kóbeıtý josparlanýda.

«L.N.Gýmılev atyndaǵy Eýrazııa ulttyq ýnıversıtetiniń fılıaly baýyrlas halyqtar arasyndaǵy dostyqtyń taǵy bir kópirine aınalady, Qazaqstan men Qyrǵyzstannyń bilim berý júıeleriniń ıntegrasııasyna yqpal etedi. Sonymen birge bul bizdiń joǵary oqý oryndary arasyndaǵy yntymaqtastyqty sapaly jańa deńgeıge kóteredi», dep atap ótti Osh memlekettik ýnıversıtetiniń rektory Qudaıberdı Qojobekov.

EUÝ ǵylymı-bilim berý jobalar, akademııalyq utqyrlyq baǵdarlamalar, birlesken bilim berý baǵdarlamalary, sheteldik mamandardy tartý boıynsha qyrǵyz áriptesterimen birlese belsendi jumys júrgizedi.

Bıylǵy oqý jylynda ýnıversıtettiń «Welcome to ENU» akademııalyq utqyrlyq baǵdarlamasy aıasynda Qyrǵyzstannan 46 stýdent bilim alýda.

Aıta ketý kerek, búginde L.N.Gýmılev atyndaǵy EUÝ-dyń álem boıynsha 12 ortalyǵy men ókildigi bar. Sondaı-aq ulttyq ýnıversıtet 450-den astam jetekshi sheteldik ýnıversıtettermen halyqaralyq yntymaqtastyq ornatqan.