Qyzylordada tuńǵysh ret jaǵajaı alańy paıdalanýǵa berildi

QYZYLORDA. 4 maýsym. Qyzylordada jaǵajaı fýtbolynyń arenasy ashyldy. Bul týraly egemen.kz tilshisi habarlady. Qyzylorda oblystyq fýtbol federasııasynyń 2013-2020 jyldarǵa arnalǵan baǵdarlamasyna sáıkes, qalanyń «Syr samaly» jaǵajaıynda arnaıy fýtbol alańy salynyp, el ıgiligine usynyldy. Atalǵan arenany Qyzylorda oblystyq fýtbol federasııasynyń tapsyrysymen «Melıorator» jaýapkershiligi shekteýli seriktestigi saldy. Arenanyń ashylý saltanatynda oblysy ákiminiń orynbasary, oblystyq fýtbol federasııasynyń prezıdenti Nurjan Álibaev, «Melıorator» JShS dırektorynyń orynbasary Meıram Jubekeshov jáne «QazTransGazAımaq» Qyzylorda óndiristik fılıalynyń dırektory Bolat Murtazaev sóz sóılep, alańnyń saltanatty túrde lentasyn qıdy. Nurjan Álibaev: «Syr óńirinde de jaǵajaı fýtbolymen aınalysyp, eldimizdiń namysyn asqaqtatatyn sańlaqtar kóp bolady dep senemiz»,– dedi. Alańnyń ashylý saltanaty jetkinshekter arasyndaǵy týrnırmen jalǵasty. Arena tarıhyndaǵy alǵashqy goldy №6 OBJSM komandasynyń oıynshysy Ersultan Ydyrysov soqty. «QazTransGazAımaq» Qyzylorda óndiristik fılıaly týrnırdiń júlde qoryn 100 myń teńge kóleminde taǵaıyndapty. 1-oryn №6 OBJSM komandasy jeńip aldy. Bul komanda sáıkesinshe, 50 myń teńgege ıe bolsa, ekinshi oryn alǵan komandaǵa 30 myń teńge buıyryp, 3-oryn ıegeri 20 myń, 4-oryn ıegeri 15 myń teńgege qol jetkizdi. Sondaı-aq, týrnırdiń úzdik qaqpashysy Baǵdáýlet Ábjan men úzdik oıynshysy Qurmet Jumaǵalı de baǵaly syılyqtarmen marapattaldy. Jalpy, jaǵajaı fýtboly Syr óńirinde ǵana emes, elimiz boıynsha baıaý damyp kele jatqan oıyn túri. Elimizdiń tek birdi-ekili aımaqtarynda ǵana bolmasa, munymen aınalysatyndar az. Degenmen, budan bylaı fýtboldyń bul túri Qyzylorda oblysynda qarqyndy damıtyn bolady. Erjan Baıtiles. Derekkóz: egemen.kz. Foto: egemen.kz.