Senatordyń aıtýynsha, búgingi tańda «Jolaýshylar tasymaly» AQ jyljymaly quram parkinde 2 228 vagon bar, olardyń 35%-ynyń paıdalanýǵa berilgenine 28 jyldan asyp ketken. Talgo vagondaryn eseptemegende jolaýshylar vagondary ortasha eseppen 63%-ǵa, al lokomotıvter 67%-ǵa tozǵan.
Senator óziniń depýtattyq saýalynda ishki júk tasymalynyń qymbattyǵy máselesin de kóterdi. Ol taýarlardyń túpki qunyn arttyrýǵa yqpal etedi. Máseleniń máni mynada: «QTJ» AQ menshiginde barlyǵy 170 tıeý-túsirý tuıyqtary bar, al olardyń jeke menshiktegi sany 3 600-den asady. Senatordyń pikirinshe, ol jerdegi tarıfterdiń baqylaýsyzdyǵy men alypsatarlyq áreketter temirjol júkteri baǵasynyń aıtarlyqtaı qymbattaýyna ákelip otyr.
«Temir jol tasymalynyń áleýmettik-ekonomıkalyq mańyzy men tranzıttik áleýetin eskere kelgende «Qazaqstan temir joly» AQ túbegeıli reformalardy qajet etedi. Osy máselelerdi sheshýdi, eń aldymen, salanyń tájirıbeli mamandaryn basshylyq laýazymdarǵa taǵaıyndaýdan bastaǵan jón dep sanaımyz. Elimizde memlekettik aktıvterdi jekeshelendirý saldarynan bolǵan jaǵymsyz jaǵdaılardy eskere otyryp, jekeshelendirilgen tuıyqtardy, bagaj bólimshelerin «Qazaqstan temir joly» AQ menshigine qaıtarý qajet», dedi depýtat.
