Sport • 09 Jeltoqsan, 2022

Astanada jeńil atletıkadan ashyq birinshiliktiń jeńimpazdary anyqtaldy

Búgin Astana qalasyndaǵy «Qazaqstan» jeńil atletıka sport kesheninde El Táýelsizdiginiń 31 jyldyǵyna oraı 2006-2007 jyly týǵan jáne odan kishi 2008-2009 jyly týǵan jasóspirimder arasynda jeńil atletıkadan Astana qalasynyń ashyq chempıonaty bastaldy. Alǵashqy kúni jarys jolyna shyqqan jasóspirimder arasynda úzdikter anyqtaldy, dep habarlaıdy Egemen.kz elorda ákimdiginiń resmı saıtyna silteme jasap.

Marjan TILEÝBEK

Merekelik sharanyń ashylý saltanatyna Astana qalasy Dene shynyqtyrý jáne sport basqarmasy basshysynyń orynbasary Erkeǵalı Korbozov, jeńil atletıka sport túrinen memlekettik jattyqtyrýshy Qýandyq Eljanov jáne №9 BJSM basshysy Aıdyn Toqbaev qatysyp, sportshylarǵa sáttilik tiledi.

«Bul shara memleketimizdiń basty merekesi – Táýelsizdik kúnine oraı ótkizilip otyr. Basty maqsatymyz – Táýelsizdik – eń basty qundylyǵymyz ekenin bolashaq urpaqqa jetkizý. Sonymen qatar jalyndap turǵan jastardyń úlken arenalarǵa shyǵýyna dańǵyl jol ashý, qalamyzda jeńil atletıkany órkendetýge barynsha kúsh salý. Daryndy jáne qarymdy qyz jigitterimiz elimizde óte kóp. Oǵan eshkimniń kúmáni bolmaýǵa tıis. Dál qazir bizdiń aldymyzda sol jastardy shoqtyǵy bıik juldyzdarǵa aınaldyryp, olardy Olga Shıshıgına, Olga Rypakova, Ǵusman Qosanov sekildi myqty jelaıaqtardyń deńgeıine jetkizý mindeti tur.

Búgingi ótkizilip jatqan dodaǵa qatysýshylardyń sany óte kóp. Árqaısysynyń kózderinen jeńiske degen umtylys anyq baıqaldy», deıdi qalalyq sport basqarma basshysynyń orynbasary Erkeǵalı Korbozov.

Jyldy qorytyndylaıtyn aıtýly saıysta jas atletshiler 9 pán, 1 estafeta boıynsha baq synaıtyn bolady. Aıtýly dodaǵa Astana qalasynyń jeńil atletteri ǵana emes, elimizdiń Qaraǵandy, Soltústik Qazaqstan oblysy, Temirtaý, Qaraǵandy qalarynan kelgen 180-ge tarta sportshy qatysýda.

Uıymdastyrýshylardyń aıtýynsha bıylǵy jarysta úzdik úshtiktegi sportshylar Astana qalasynyń qurama komandasyna iriktelinip, Respýblıkalyq, halyqaralyq jarystarǵa qatysýǵa joldama ala alady.

Jarystyń alǵashqy kúni uldar men qyzdar 50 m, 400 m, 1500 m uzyndyqqa sekirip, sporttyq snarıadtardy laqtyryp, sondaı-aq estafeta jarysynda baqtaryn synady.

Jarystyń qorytyndysy boıynsha qyzdar arasynda 50 m uzyndyqqa sekirýde birinshi oryndy Aıdana Aıapova enshilese, ekinshi jáne úshinshi orynǵa Darıa Rynda men Anna Mıshenko jaıǵasty. Dál osyndaı qashyqtyqta uldar arasynda da úzdikter anyqtaldy. Olar: 1-oryn Rýslan Qurmanálıev, 2-oryn Mıhaıl Vovchenko, 3-oryn Artýr Zagorskıı.

Al komandalyq estafetalyq júgirý (4×200m) jarysy boıynsha Qaraǵandy qalasynyń komandasynan quralǵan sportshylar (Qaraǵandy-1) 1 saǵat 42 mınýt 57 sekýnd ishinde eńserip birinshi bolyp máre syzyǵyn kesti. Ekinshi oryn – Temirtaý qalasynyń qurama komandasynda. Al úzdik úshtikti Qaraǵandy qalasynyń ekinshi qurama komandasy túıindedi.

Aıta keteıik ashyq chempıonat erteńge deıin jalǵasady.

Jarystyń baǵdarlamasy boıynsha erteń saǵat 10:00-14:00-ge deıin «Qazaqstan» jeńil atletıka sport kesheninde ótedi.