«Búginde bir jarym myń shaqyrymnan astam jylý jelileri aýystyrýdy jáne jóndeýdi qajet etedi. Olardyń ortasha tozýy 75 paıyzdan asady, al Arqalyq, Rıdder, Shemonaıha qalalarynda jelilerdiń tozyǵy jetken. Úkimet bul máseleni úsh jyldyń ishinde sheshýi kerek. Komıssııa esebine sáıkes, áńgime 528 mlrd teńge týraly bolyp otyr. Bul qarajat tıisti bıýdjettik nesıeleý jáne tarıftik saıasat arqyly qamtamasyz etilýi tıis», dedi Prezıdent.
Sonymen qatar Prezıdent 5 jyldan astam ýaqyttan beri kárizdik tazartý qurylystaryn salý jáne jańǵyrtý máselesi áli kúnge deıin sheshimin tappaǵanyna toqtaldy.
«Qazir biz bıýdjettik qarjylandyrý men nesıelerdi tartý týraly aıtyp jatyrmyz. Jarııalanǵan josparlar eshqashan oryndalmady. Endi mine, Úkimet pen ákimder ilesýdiń ornyna josparlardy tómen qaraı qaıta qarap, 2025 jylǵa deıin nebári 7 jobany júzege asyrýdy josparlap otyr. Al búkil el boıynsha bizde 68 problemaly kárizdik tazartý qurylystary bar», dep atap ótti Prezıdent.
Memleket basshysynyń aıtýynsha, bul máseleniń basty sebebi - tarıf saıasatynyń durys júrgizilmeýi.
«Osy saıasat tabıǵı monopolııa qyzmetteriniń sapaly ári qoljetimdi bolýyn qamtamasyz etýge tıis. Bul qyzmettiń tegin bolmaıtyny túsinikti. Nysandardy kútip ustaýǵa jáne jańǵyrtýǵa qajetti qarajat tarıf esebinen bólinýi kerek. Bıznesten shyǵynǵa batyp jumys iste dep talap etý orynsyz. Ár nárse jónimen jasalýǵa tıis. Men bul týraly Joldaýda aıttym. Biraq naqty ári nátıjeli jumys áli atqarylmaı otyr», dep qosty Q.Toqaev.
Jańa tarıf saıasatynyń erejeleri bekitilgen joq. Tarıfterdi qarastyrý jáne kelisý úderisi jabyq esik jaǵdaıynda ótedi. Tabıǵı monopolııa sýbektileriniń mindettemelerdi oryndaý tártibin tıisti deńgeıde qadaǵalaý kerek.
