– Qurmetti áriptester, qurylysshylar! Sizder qysqa merzim ishinde aýqymdy jumys atqaryp, Amanqaraǵaı aýylynyń turǵyndaryna qıyn ýaqytta úlken qoldaý kórsettińizder. Memleket basshysynyń tapsyrmasyna sáıkes órttiń saldaryn joıý úshin jedel sharalar qabyldanyp, turǵyn úılerdiń qurylysy dereý bastaldy. Osy baǵytta jumyldyrylǵan óńirlik merdiger uıymdardyń úılesimdi jumysy men tıimdi josparlaýynyń nátıjesinde, 91 turǵyn úıdi salý jumystary merziminen buryn aıaqtaldy, – dedi Qaıyrbek Aıtbaıuly.
6 qyrkúıekte bastalǵan Áýlıekóldiń irgesindegi «Birlik» shaǵyn aýdanynyń qurylysy aınalasy bir jarym aıdyń ishinde tolyq aıaqtaldy. Qar túspeı 45 kúnniń ishinde boı kótergen 91 úıdi salýǵa atsalysyp, azamattyq belsendilik tanytqany úshin úsh birdeı qurylys kompanııasynyń basshylary «Qurmet» ordenimen marapattaldy. Olardyń qatarynda «Stroı Elıt Dom» JShS-nyń baıqaýshylar keńesiniń tóraǵasy Dáýlet Ybyraıymov, CK KBS kompanııasynyń dırektory Baýyrjan Qaramakın jáne «Rýdnyısokolovstroı» AQ bas dırektory Nurlan Orymbaev bar.
Al «Rýdnyısokolovstroı» AQ-ǵa qarasty qurylys basqarmasynyń aǵa proraby Oksana Vladımırova men «BK-Stroı» JShS-nyń tas qalaýshysy Oljabaı Jaqsylyqov III dárejeli «Eńbek Dańqy» ordenine ıe boldy.
Sondaı-aq mınıstr «Stroı Elıt Dom» JShS-nyń brıgadıri Erbolat Aryqqulov, «Alıýmınstroı» JShS dırektorynyń orynbasary Darhan Ábdikov, «Alııa-Servıs» JShS fılıalynyń dırektory Taıyr Bekjanov, «Parasat Stroı Proekt» JShS dırektory Ábdirahman Borash jáne «BK-Stroıprom» JShS dırektory Sergeı Kım sııaqty basshy-uıymdastyrýshylarǵa «Eren eńbegi úshin» medalin tabys etti.
Budan ózge de taǵy birqatar azamat Memleket basshysynyń Qurmet gramotasyn aldy.
Qostanaı oblysy
