96 kılo salmaqta kúsh synasqan Nurǵısa Ádiletuly buǵan deıin jastar arasyndaǵy qurlyqtyq deńgeıdegi jarystarda daralanyp júrgen. Osydan eki jyl buryn ol Tashkentte uıymdastyrylǵan Azııa birinshiliginde bas júldeni oljalaǵan edi. Sol básekede qandasymyz basty básekelesi Ońtústik Koreıanyń ókili Iong Hýnnan 36 kılo artyq salmaqty eńserip, barsha jankúıerdiń qoshemetine bólendi. Byltyr Nurǵısa eresekter dýyna alǵash ret qosylǵanyna qaramastan Sary qurlyqtyń basty dodasynda kúmis medal ıelendi. Mine, endi ol álem chempıonatynyń kúmis júldegeri atanyp otyr. Bogotada qazaq ziltemirshisi qossaıysta 383 (174+209) kılo salmaqty kóterdi. Bul jarystyń bas júldesin bahreındik Lesman Paredes jeńip aldy. Onyń kórsetkishi – 397 (185+212) kılo. Qola medal kolýmbııalyq Ior Morenoǵa buıyrdy.
Osy salmaqta taǵy bir qazaq aýyr atleti óner kórsetken edi. Biraq Álisher Seıitqazynyń qadamy sátti bolmaı, 351 (160+191) kılolyq nátıjemen ol 11-oryndy qanaǵat tutty.
