Depýtattyń aıtýynsha, Qazaqstan altyn óndirý boıynsha álemniń TOP-20 eliniń qataryna kiredi. Biraq zergerlik otandyq óndiriske altynnyń negizgi jetkizýshileri – lombardtar men kóleńkeli naryq qatysýshylary ekenin aıtty.
«Resmı statıstıkaǵa sáıkes, 2021 jyly eldiń zergerlik buıymdar naryǵy $ 76 mln qurady, onyń tek $ 4 mln, ıaǵnı 5%-y ǵana otandyq zergerlik buıymdar óndirýshileri óndirgen. Qazaqstan zergerler lıgasynyń baǵalaýy boıynsha zergerlik buıymdar naryǵy 90% kontrafaktilik jáne kontrabandalyq buıymdardan turady», dedi Ǵumar Dúısembaev.
Senator elimizdiń zergerlik ónerkásibin damytýǵa, ıaǵnı jańa jumys oryndaryn ashýǵa jáne bıýdjet túsimderiniń ósýine baǵyttalǵan birqatar usynys aıtty.
«Osy oraıda jumysty kóleńkeli ımportqa qarsy kúresti kúsheıtý jáne kontrabandany shekteý, qarjylyq jáne qarjylyq emes yntalandyrý sharalaryn engizý arqyly qazaqstandyq zergerlik salanyń básekege qabilettiligin arttyrý, lombardtardyń paıdalanýda bolǵan zergerlik buıymdardy tek qana ishki naryqqa ótkizýin mindetteý, otandyq zergerlerdiń quzyretin kúsheıtýdi usynamyn», dedi depýtat.
