Spıkerdiń aıtýynsha, ınvestorlardy bilim berý salasy qyzyqtyrady. Sońǵy 2 jylda memlekettik qoldaý sharalarynyń arqasynda ınvestorlar 7 mektep salyp, 6 myń oqýshy orny quryldy.
«Bilim berý nysandary MJÁ tetigi boıynsha da iske asyrylýda, onyń sheńberinde qalada 20 myń jańa oqýshy ornyn qurýǵa múmkindik bergen 6 jalpy bilim beretin mektep salyndy. Jeke ınvestorlar esebinen densaýlyq saqtaý jáne sport nysandary da salynýda. Basty maqsat – árbir turǵyn úshin qoljetimdilik jáne halyqqa sapaly qyzmet kórsetý. Atalǵan ınvestısııalyq jobalardy iske asyrý elorda bıýdjeti úshin oń áser etedi», dep atap ótti E. Bekmurzaev.
2022 jyly elordada ústel tennısi ortalyǵy iske qosyldy, ınvestor jobany iske asyrýǵa 2 mlrd teńgeden astam qarajat saldy. Kelesi jyly jalpy ınvestısııa kólemi 5,5 mlrd teńgeni quraıtyn kópfýnksıonaldy balalar men jasóspirimder sport ortalyǵynyń, sondaı-aq 600 mln teńgege dzıýdo ortalyǵynyń qurylysy aıaqtalady.
Sondaı-aq qala turǵyndarynyń ótinishi boıynsha elordanyń sol jaǵalaýynda jeke ınvestor Oqýshylar saraıynyń qurylysyn júrgizýde. Ony kelesi jyly iske qosý josparlanyp otyr.
«Múmkindigi shekteýli jandardyń jattyǵýyna jaǵdaı jasaý maqsatynda paralımpıadalyq jattyǵý ortalyǵy men «Tarlan» Muz arenasynyń qyzmetin uıymdastyrý boıynsha MJÁ sharty jasaldy. Nysandar erekshe fızıkalyq múmkindikteri bar adamdarǵa tolyǵymen beıimdelgen. Búgingi tańda sport nysandaryna 1, 2, 3 múgedektik toby bar 1 563 adam jáne 650 bala keledi», dep tolyqtyrdy spıker.
Halyq sanynyń ósý qarqyny qalanyń azyq-túlikke degen qajettiligin arttyrady. Sondyqtan qazir agroónerkásiptik keshen salasyndaǵy jobalar boıynsha jumystar júrgizilýde. Bul salada jalpy ınvestısııa somasy 86,9 mlrd teńgeni quraıtyn 22 ınvestısııalyq joba iske asyrylýda.
