Buqpa taýynyń eteginde ótken dúbirli doda el táýelsizdigine jáne jerles búrkitshi Másip Batyrhanulyn eske alýǵa arnaldy. Sóz arasynda baıraqty básekeniń 2017 jyldan bastap halyqaralyq mártebege ıe bolǵandyǵyn synalap aıta ketelik. Asylynda mundaı el nazaryn ózine aýdaratyn aıtýly jarysty uıymdastyrý kóne dúnıeniń kómbesin ashyp, ýaqyt tozańy tumshalaǵan Alashtyń ǵajaıyp salt-dástúrin qaıta tiriltýge, búgingi urpaq kádesine jaratýǵa, jas tolqynnyń kókiregine ejelgi sal-seriler dáýiriniń saltanat sezimin sebezgileýge yqpal etpek. Ári el arasyndaǵy yntymaqtyń altyn arqaýyn bekite túsýge de septigi bar.
– Qazaq halqynyń tarıhy óte baı. Keıingi urpaq ony umytýǵa bolmaıdy, – deıdi Oblystyq dene shynyqtyrý jáne sport basqarmasynyń basshysy Áset Býkýbaev, – uly dalanyń ulaǵaty men rýhanı baılyǵy shymyrlap qaınap, keıingi jastyń súıegine sińýi kerek.
Baıraqty báseke ulaǵaty mol ulttyq dástúrdi nasıhattaýǵa keń jol ashqandyǵyn aıta ketýge tıistimiz. Záý bıikte erkin samǵaǵan qyran qustar kóńilińdi jeldi kúngi teńizdeı tolqytady eken.
Jarys úsh kezeńmen ótkizildi. Áýeli búrkit pen suńqarlardyń syrtqy pishini, tuǵyrǵa qonysy, búgingi ańshynyń kileń teriden tigilgen, bylǵarymen qaptalǵan jeńil, yqsham, jyly sporttyq kıimderi sarapqa salyndy. Qustardyń kók aspanda samǵap ushýy, qusbeginiń shaqyrýyna oraı qaıtadan oralýy eksheldi. Shyrǵa tartyldy. Eń bir qyzyqty tus osy boldy. Aq qardyń ústinde saı-saıdy jaǵalap, jan saýǵalar buta izdep josyla shapqan qyzyl túlki ıen dalada bir ýys ot zymyrap bara jatqandaı kórinedi eken. Qos qanatyn qomdap, oqtaı atylǵan, baby kelisken qyran atqan oqtaı zaýlap kelip, ótkir tuıaǵymen ilgendegi kórinis qaıtalanbaıtyn bir qyzyq.
Eki kúndik jarystyń qorytyndysy boıynsha Almaty oblysynan kelgen qusbegi Seıitjan Aıan úzdik dep tanyldy, Almaty qalasynyń ókili Esentaı Sultanseri ekinshi oryndy ıelense, Qaraǵandy oblysynyń turǵyny Berdibek Sez úshinshi orynǵa ornyqty. «Suńqarmen ań aýlaý» atalymy boıynsha almatylyqtar Baıantaı Ermuhan men Seıitjan Almaz jeńiske jetse, astanalyq qusbegi Erasyl Serikbekulynyń mereıi ústem boldy. Qaraǵandylyq Tańat Ospanqulov, aqmolalyq Ýálıhan Shyńǵys, Keńes Darhandardyń da ónerin ataı ketken oryndy bolmaq.
Túrkııanyń Qazaqstan Respýblıkasyndaǵy elshisiniń birinshi keńesshisi Týrhan Dılmach eki el arasyndaǵy tarıhı jáne rýhanı baılanystyń ózektes ekendigin tilge tıek etti. Sóz sońynda zamanynda qus tilin bilip, ónerin óristetken Másip Batyrhanuly týraly bir aýyz sóz aıta ketelik. 1930 jyldary qyran qusynyń arqasynda tutas aýyldy ashtyqtan aman alyp qalǵan. Ekinshi dúnıejúzilik soǵys jyldary baǵaly ań terisin satýdan túsken qarajatty maıdanǵa kómek retinde bergen. Aty ańyzǵa aınalǵan tulǵany eske alý úshin osyndaı baıqaýlar jıi ótkiziledi.
Aqmola oblysy
