Respýblıkada óńirlerdiń ishindegi jol ınfraqurylymyn damytý úshin 486 joba iske asyrylyp jatyr. Onyń ishinde 391 joba boıynsha kúrdeli jáne ortasha jóndeý jumystary qolǵa alynsa, jańǵyrtý men tutastaı qurylysqa baılanysty 95 joba júzege asyrylyp keledi. Osy jyldyń aıaǵyna deıin avtomobıl joldaryn jóndeýge baılanysty 164 jobany, sondaı-aq joldy salyp, jańǵyrtý boıynsha 6 jobany sońyna deıin jetkizý josparlanyp otyr.
«Soltústik Qazaqstan oblysyndaǵy Lavrovka – Chkalovo avtomobıl jolynyń 160-168 shaqyrymdaı aralyǵyn jańǵyrtý men Qyzylorda oblysyndaǵy Áıteke bı – Basyqara aýdandyq mańyzdaǵy kólik jolyndaǵy kópirdi jóndeýge baılanysty jumystar aıaqtalýǵa jaqyn. Sondaı-aq Shymkenttegi shyǵys aınalma jolynda júrgizilip jatqan qurylystyń 1 kezeńi aıaqtalýǵa jaqyn qaldy», dep túsindirdi IIDM Avtomobıl joldary komıtetiniń ókilderi.
Sondaı-aq bıyl Almatydaǵy Abaı dańǵylynyń jalǵasyn abattandyrý boıynsha jumystar aıaqtalady. Júrgizilgen jumystardyń qorytyndysy boıynsha elimizdegi jergilikti joldar jelisiniń normatıvtik jaǵdaıy jyl sońyna deıin 85%-ǵa jetkiziledi dep kózdelip otyr. Osy oraıda óńirlerge de baılanysty aldyn ala qorytyndylar shyǵaryldy.
«Aldyn ala jasalǵan qorytyndyǵa súıensek, jergilikti joldardyń jaǵdaıy Mańǵystaý (95%), Jambyl (95%) jáne Almaty (91%) oblystarynda jaqsy. Al sapasy kóńil kónshitpeıtin joldar Batys Qazaqstan (39%), Aqtóbe (66%) jáne Atyraý (70%) oblystaryna tıesili», dep naqtylady Avtomobıl joldary komıtetiniń ókilderi.
