Senatorlar bir jyl ishinde elimizdiń ár óńirindegi arnaıy ekonomıkalyq aımaqtarǵa baryp problemalardy zerdeledi, arnaıy ekonomıkalyq aımaqtarǵa qatysýshylarmen kezdesti, damýdyń odan ári perspektıvalaryn aıqyndaý jáne osy salanyń qyzmetin jetildirý úshin salalyq memlekettik organdarǵa usynystar ázirledi.
Komıtet tóraǵasy Serikbaı Trumov dóńgelek ústel barysynda memlekettik saıasattyń negizgi baǵyttarynyń biri – ınvestorlar úshin qolaıly jaǵdaı jasaý jáne eldegi ınvestısııalyq ahýaldy jaqsartý ekendigin atap ótti.
«Komıtet músheleri arnaıy ekonomıkalyq aımaqtardyń tıimdiligin qamtamasyz etý maqsatynda AEA nysandaryna júıeli túrde saparǵa shyǵyp, olardyń qyzmetine taldaý jasady. Osy sharalardyń nátıjesi boıynsha zańnamalyq aktilermen rettelgen kóptegen máseleler sheshildi, qosymsha bıýdjet qarjysy bólindi, sondaı-aq Úkimetke birqatar usynystar jiberildi», dedi ol.
Depýtattardyń usynymdarynda mynadaı usynystar boldy: ınfraqurylymmen qamtamasyz etý, gaz taratý stansııasyn salý, ınfraqurylym obektilerin basqarý jónindegi biryńǵaı operatordy aıqyndaý, jeke kapıtal men ınvestısııa tartý jáne basqa da ózekti máseleler qamtyldy.
Indýstrııa jáne ınfraqurylymdyq damý mınıstrliginiń ókili senatorlardyń usynystarynyń basym bóligi nazarǵa alynǵanyn atap ótip, AEA-ny jetildirý jónindegi sharalardy iske asyrý maqsatynda zańnamalyq aktilerge túzetýler toptamasy ázirlengenin atap ótti.
Dóńgelek ústel barysynda sonymen qatar Ulttyq ekonomıka mınıstriniń orynbasary Azamat Ámirın, Jambyl oblysy ákiminiń orynbasary Qanatbek Mádibek, Syrtqy ister mınıstrliginiń ókili jáne AEA qatysýshylary baıandama jasady.
