Jıyn barysynda Prezıdenttiń keńesshisi Málik Otarbaev Memleket basshysy Q.Toqaevtyń quttyqtaý hatyn oqydy. «Ydyrys Kóshkinov elimizdiń birneshe oblysyn basqaryp, el múddesi úshin kúresken aıtýly tulǵalardyń biri. Osyndaı kezeńde el úshin eńbek etken arystardyń esimin este qaldyrý, elge etken qyzmetin jan-jaqty dáripteý jas urpaqty otansúıgishtikke tárbıeleý úshin qajet. Y.Kóshkinov jáne tulǵatanýdyń ózekti máselelerine arnalǵan jıynnyń mán-mańyzy zor. Kúrdeli kezeńde ult múddesine qyzmet etip, basyn báıgege tigip, jankeshtilikpen eńbek etken tulǵalardy ulyqtaý bizdiń paryzymyz» delingen quttyqtaý hatta.
Jıyn moderatory, Ortalyq memlekettik arhıv dırektory Sábıt Shildebaı atap ótkendeı, HH ǵasyrdyń 20-30 jyldary ártúrli deńgeıdegi memlekettik qyzmetterde bolyp, qazaq halqy úshin eren eńbek sińirgen Ydyrys Kóshkinovtyń qoǵamdyq-saıası jáne memlekettik qyzmeti búginde tereń zertteýdi qajet etedi. Osy kezeńde Y.Kóshkinov dárejesinde eńbek etken qaıratkerlerdiń, tarıhı tulǵalardyń kópshiligi búginde óz dárejesinde zerttelmeı keledi. О́kinishke qaraı olardyń ult múddesi jolyndaǵy qyzmeti zertteýshilerdiń nazarynan tys qaldy. Osy oraıda «Ydyrys Kóshkinov: Qujattary men materıaldar jınaǵynyń» jaryqqa shyǵýy «Ydyrystanýǵa» qosylǵan súbeli úlestiń biri sanalady.
Aıtýly shara barysynda Arhıv isteri jáne qujattamany basqarý komıtetiniń tóraǵasy Qýat Borash, «Ǵylym ordasy» dırektorynyń ǵylymı ister jónindegi orynbasary Nurlan Seıdin, Almaty oblystyq ishki saıasat basqarmasy «Qoǵamdyq damý ortalyǵy» KMM basshysy Erasyl Tolymbekuly, Almaty oblysy Kegen aýdany, Uzynbulaq aýylyndaǵy Ydyrys Kóshkinov atyndaǵy mekteptiń dırektory Abaı Hasenov qatysyp, tulǵa esimin dáripteýge baılanysty qolǵa alynǵan ári atqarylǵan isterge baılanysty pikirlerin ortaǵa saldy.
«Ydyrys Kóshkinov: Qujattary men materıaldar jınaǵy» qurastyrýshylardyń biri, tarıh ǵylymdarynyń kandıdaty Rashıd Orazov «Ydyrys Kóshkinovtyń ómiri men qyzmetine» qatysty baıandama jasap, qoǵamdyq-saıası jáne memlekettik qyzmeti, qýǵyndalýy, Qazaq ulttyq avtonomııasyn qurý ıdeıasy, Jetisýdaǵy jer-sý reformalary, Orta Azııa men Qazaqstandaǵy ulttyq-memlekettik mejeleý jáne qazaq jerleriniń bir respýblıka quramyna birigýi jolyndaǵy eńbekterine keńinen toqtalyp ótti.
Qaıratkerdiń qyzy Raıa Ydyrysqyzy otbasy ǵana emes, el basyna týǵan sol bir qıyn jyldarmen baılanysty esteligimen bólisip, uıymdastyrýshylarǵa rızashylyǵyn bildirdi.
Jıyn barysynda Sh.Ýálıhanov atyndaǵy Tarıhy jáne etnologııa ınstıtýty dırektorynyń ǵylym jónindegi orynbasary Shámek Tileýbaev, tarıh ǵylymdarynyń doktory Svetlana Smaǵulova jáne basqa da ǵalymdar Ydyrys Kóshkinovtyń qýdalanýyna, shyǵarmashylyǵyna, sol kezeńdegi saıası jaǵdaılarǵa qatysty baıandama jasady. Sonymen birge jýrnalıst Saltanat Bakeevanyń «Ult úshin týǵan Ydyrys» derekti fılmi kórsetilip, Ortalyq memlekettik arhıvi men Ortalyq Ǵylymı kitaphana qorlarynan túpnusqa arhıv qujattarynyń, kitap, gazet-jýrnaldar kórmesi uıymdastyryldy.
ALMATY
