Qyzmetkerler jumys berýshiniń qoldanystaǵy zańnamany buzyp, aldaǵy ýaqytta jumystan bosatatyny týraly málimdegen.
«Bizdiń basqarmanyń ınspektorlary «Kazakhstan Petrochemical Industries Inc» (KRI) JShS zaýyty qyzmetkerlerinen túsken ótinishter negizinde jospardan tys tekserý júrgizedi. Inspektorlar tekserý kezinde aryzdanýshylardyń barlyq dálelin zerdeleıdi», dep aqparat taratty oblystyq basqarmadan.
Bul – Memleket basshysy Atyraýǵa kelgen saparynda iske qosqan gaz-hımııa kesheni. Onyń qurylysyna 4 300 adam jumysqa tartylǵan. Keshen tolyq iske qosylǵanda 631 adam turaqty jumyspen qamtylady. «Teńiz» ken ornynda óndiriletin shıkizatty óńdeýge baǵyttalǵan keshen jylyna 500 myń tonna polıpropılen shyǵarady.
Alaıda ınjener Nına Krasılnıkovanyń áleýmettik jelidegi jazbasyna qaraǵanda, «KPI» JShS-da ınjenerlerden bastap departament dırektorlaryna, zaýyttyń bas ınjenerine deıingi qyzmetkerlerdi jappaı jumystan bosatý júrip jatyr.
«Jumystan bosatylǵan qyzmetkerlerdiń mol óndiristik tájirıbesi bar. Olar osy zaýyttyń qurylysy men iske qosylýyna aıtarlyqtaı úles qosty. Olardyń joǵary bilikti maman ekeni kúmán keltirmeıdi. Jumystan bosatylǵan barlyq qyzmetker – Atyraý oblysynyń týmalary. Barlyq qyzmetkerge qurylymdy qaıta uıymdastyrýǵa baılanysty atqaratyn laýazymdaryn qysqartý týraly habarlama berildi. Kompanııa basshylyǵy osy máselege qatysty alańdaýǵa eshqandaı sebep joq ekenin, bul Eńbek kodeksine qaıshy kelmeıtinin jarııalady. Osylaısha, 60-qa jýyq joǵary bilikti qyzmetker qysqartýǵa ushyrady», dep jazdy Nına Krasılnıkova.
