«Qazaq ıt tuqymdary – Tazy men Tóbetti saqtaý jáne kóbeıtý týraly zań jobasy keń aýqymdy baǵyttardy qamtıdy. Onyń biri genetıkalyq sapasyn ǵylymı baǵalaý, seleksııalyq saraptamalar júrgizý, jınaqtaý arqyly osy tuqymdardy saqtaýǵa qajetti ǵylymı baza qurý», dedi qujatty tanystyrǵan senator Olga Býlavkına.
Zań jobasynyń negizgi maqsaty – qazaqtyń Tazy jáne Tóbet ıt tuqymdaryn saqtaý jáne ósimin molaıtý salasyndaǵy qyzmetti júzege asyrýdyń quqyqtyq, uıymdastyrýshylyq jáne ekonomıkalyq negizderin belgileý.
Zań jobasy aıasynda «Janýarlar dúnıesin qorǵaý, ósimin molaıtý jáne paıdalaný týraly», «Memlekettik áleýmettik tapsyrys, strategııalyq seriktestikti júzege asyrýǵa memlekettik tapsyrys, granttar men nagradalar týraly» Qazaqstan Respýblıkasynyń zańdaryna ózgerister men tolyqtyrýlar engizilýde.
Atap aıtqanda, ıtterdiń qazaq tuqymyn saqtaý jáne ósimin molaıtý salasyndaǵy memlekettik basqarýdyń negizgi qaǵıdattary belgilendi, ıtterdiń qazaq tuqymdy tuqymdaryn saqtaý men ósimin molaıtýdy qamtamasyz etý júıesine jaýapty memlekettik organdar men uıymdar aıqyndalyp, olardyń quzyreti aıqyndaldy.
Sonymen qatar zań jobasy ýákiletti organ aıqyndaıtyn mamandandyrylǵan uıymnyń qurylymdyq bólimshesi bolatyn Qazaq ıt tuqymdarynyń ulttyq ortalyǵyn qurýdy, sondaı-aq qazaq ıtterin saqtaý jáne ósimin molaıtý maqsatynda qyzmetti qarjylandyrýdy kózdeıdi.
