Úkimet basshysy Indýstrııa jáne ınfraqurylymdyq damý mınıstrliginiń ujymyna Marat Qarabaevty tanystyra otyryp, onyń jańa tehnologııalar, ındýstrııa jáne ınnovasııalyq damý salalarynda jumys tájirıbesi mol, ózin maqsatqa qol jetkizýde qajetti resýrstardy jumyldyra alatyn joǵary bilikti maman retinde kórsetkenin atap ótti.
«Memleket basshysy óńdeý ónerkásibiniń ósý qarqynyn jáne qosymsha quny joǵary qaıta óńdeý ónimderin shyǵarýdy yntalandyrý, sondaı-aq ındýstrııanyń bazalyq salalaryn, logıstıkalyq áleýetti jáne kólik ınfraqurylymyn damytý jóninde mańyzdy mindetterdi belgiledi», dedi Álıhan Smaıylov.
Premer-mınıstr Ekologııa jáne tabıǵı resýrstar mınıstrliginiń ujymyna Zúlfııa Súleımenovany tanystyra otyryp, vedomstvo burynǵy ekologııalyq máselelerdi, onyń ishinde Aral teńizi men Semeı óńirine qatysty máselelerdi sheshý, sondaı-aq sý resýrstaryn basqarý jáne tabıǵat pen janýarlar álemin qorǵaý jónindegi mindetterge qol jetkizý boıynsha jumysty jandandyrýy tıis ekenin atap ótti.
«Iri kásiporyndardyń zııandy qaldyqtaryn kezeń-kezeńmen tómendetýge qol jetkizý jáne olardy jańa tehnologııalardy engizýge yntalandyrý qajet, óıtkeni bul azamattarymyzdyń densaýlyǵyna tikeleı baılanysty», dedi Álıhan Smaıylov.
Ádilet mınıstrliginiń ujymymen kezdesýde Premer-mınıstr jańa basshy Azamat Esqaraev pen vedomstvo qyzmetkerleri jaqynda qabyldanǵan barlyq zańdar boıynsha zańǵa táýeldi aktilerdi ázirleýdi jáne osy máselede tıisti vedomstvoaralyq úılestirýdi qamtamasyz etýi tıis ekenin aıtty.
Sonymen qatar, onyń aıtýynsha, normatıvtik-quqyqtyq aktilerdi saraptaý sapasyn arttyrý, jalpy sarapshylar qoǵamdastyǵymen belsendi ózara is-qımyl jasaý jáne «modeldik» zańdar nysanynda jańa zańnamalyq bazany qalyptastyrý boıynsha jumysty jalǵastyrý qajet.
«El Prezıdenti memlekettik basqarýdyń barlyq deńgeılerinde sheshim qabyldaý prosesin jedeldetý mindetin qoıyp otyr. Mundaı tásil qajetti áleýmettik jáne ekonomıkalyq reformalardy jedel júrgizýge múmkindik beredi», dedi Álıhan Smaıylov.
Oqý-aǵartý mınıstri Ǵanı Beısembaevtyń aldynda turǵan basym mindetterdi atap ótken Úkimet basshysy «Jaıly mektep» ulttyq jobasyn sapaly iske asyrý, oqý oryndarynyń qaýipsizdigin qamtamasyz etý, salany oqytý men sıfrlandyrýdyń ozyq ádistemelerin engizý qajettigine nazar aýdardy.
Onyń aıtýynsha, mektepke deıingi jáne mektepten tys, kásiptik bilim berý júıesin odan ári damytý qajet.
«Bilim berýdiń bastapqy kezeńderinde adamı kapıtaldyń jáne tutastaı memleketimizdiń odan ári damýynyń negizi qalanady. Úkimet tarapynan bilim berý salasyna kóp kóńil bólinedi: muǵalimderdiń jalaqysy kóterilýde, jańa mektepter men balabaqshalar ashylýda, oqytýdyń zamanaýı formattary engizilip jatyr. Biz salanyń barlyq problemalyq máselelerin josparly túrde qarap, sheshim qabyldaýdy jalǵastyramyz», dep Álıhan Smaıylov burynǵy oqý-aǵartý mınıstri Ashat Aımaǵambetovke atqarǵan jumysy úshin alǵys bildirdi.
Úkimet basshysy Mádenıet jáne sport mınıstrliginiń ujymyna jańa basshy Ashat Oralovty tanystyra otyryp, vedomstvonyń basym mindetteri Qazaqstannyń tarıhı-mádenı murasyn saqtaý jáne dáripteý, respýblıkanyń halyqaralyq arenadaǵy bedelin arttyrý, sondaı-aq sportty damytý tásilderin ózgertý bolyp tabylatynyn atap ótti.
«Buqaralyq sportty damytýǵa basa nazar aýdaryp, kásibı sportshylardyń jańa býynyn daıarlaý deńgeıin kóterýimiz kerek. Barlyq kúsh-jiger osyǵan jumsalýy tıis», dedi Álıhan Smaıylov.
