Berik Asylov ótken jyldyń qańtar aıynda jasalǵan qylmystar boıynsha barlyǵy 5 300 qylmystyq is qozǵalǵanyn habarlady. Olardyń basym bóligi boıynsha QR IIM tergeý júrgizdi, óıtkeni olar negizinen kisi óltirý, urlyq, qaraqshylyq, buzaqylyq jáne qarý urlaý faktilerine qatysty bolǵan.
«UQK memleketke opasyzdyq jasaý, bılikti basyp alý jáne asa iri kólemde para alý týraly ister boıynsha tergeý júrgizdi. Arnaıy prokýrorlardyń óndirisinde barlyǵy 720 qylmystyq is bolǵan. Bul ister boıynsha tyıym salynǵan ekstremıstik qozǵalystarda turǵan 25 adam ustaldy. Uıymdasqan qylmystyq toptardyń 42 múshesi qamaýǵa alyndy. Sonymen qatar kúdiktilerdiń arasynda destrýktıvti dinı aǵymdardyń 8 jaqtaýshysy bar. 126 adam buryn da kisi óltirý, urlyq jáne tonaý úshin sottalǵany anyqtaldy», dep túsindirdi Berik Asylov.
Onyń aıtýynsha, tártipsizdikke negizinen 35 jasqa deıingi jastar qatysqan.
«Sonymen qatar birqatar shetel azamatyna da aıyp taǵyldy. Olardyń arasynda О́zbekstan, Reseı, Qyrǵyzstan jáne Tájikstan azamattary bar. Qazirgi ýaqytta 573 adam sottalyp, óz jazasyn ótep jatyr», dedi Bas prokýror.
Sonymen qatar Berik Asylov qańtardyń qaraly kúnderinde kúsh qurylymdarynyń jekelegen qyzmetkerleri ustalǵandarǵa qatygezdikpen qaraýǵa jol bergenin ókinishpen qosa aıtty.
«Muny aqtaýǵa bolmaıdy. Prezıdent tapsyrmasyna sáıkes, azaptaýdy qoldanǵan adamdar, laýazymdary men erejelerine qaramastan, laıyqty jazaǵa tartylady. Azamattardyń azaptaý týraly ótinishteri boıynsha barlyǵy 329 qylmystyq is qozǵaldy. Olardyń negizgi bóligi sybaılas jemqorlyqqa qarsy qyzmet óndirisinde boldy. Arnaıy prokýrorlar polısııa men UQK qyzmetkerlerine qatysty qylmystyq isterdi tergedi. Nátıjesinde Almaty oblysynyń polısııa ǵımaratynda 24 adamdy azaptaý týraly is sotqa joldandy», dedi Berik Asylov.
Jalpy sotta 1 221 adamǵa qatysty ister qaraldy, onyń ishinde 1 205 azamat sottaldy. Qazir tergeý satysynda 315 adamǵa qatysty 127 qylmystyq is tur. Olar boıynsha tergeý sharalary jalǵasyp jatyr.
«Memleket basshysy óz Joldaýynda narazylyq bildirýshilerge raqymshylyq jasaý qajettigin atap ótti. Sondyqtan «Raqymshylyq týraly» zań aıasynda arandatýshylardyń yqpalyna túsken jáne jappaı tártipsizdik jaǵdaıynda qylmystyq áreketter jasaǵan adamdar jazadan bosatyldy. Búginde 1 095 adamǵa raqymshylyq jasaldy, sondaı-aq aýyr qylmys jasaǵan 1 001 sottalýshynyń jaza merzimi qysqardy», dep qorytyndylady B. Asylov.
