«Búgin Qasiretti qańtar oqıǵasyna bir jyl tolyp otyr. Eldigimizge qaýip tóndirgen bul oqıǵa tarıhymyzdyń qaıǵyly paraǵy retinde jazyldy. Sol kezde sherýge shyqqan halyqty óz múddelerine paıdalanǵysy kelgen qylmysty toptyń maqsaty qandaı bolǵany qazir anyqtalyp jatyr. Olar arandatý arqyly el irgesine syzat túsirip, jymysqy áreketterin iske asyrýdy kózdedi. Alaıda, eldiń birligi men Memleket basshysy Qasym-Jomart Kemeluly Toqaevtyń batyl sheshimderiniń arqasynda biz bul syn-qaterdi eńserip, keshendi reformalardy qolǵa aldyq», dep jazdy Senat Tóraǵasy.
Máýlen Áshimbaevtyń aıtýynsha, halyqtyń ádilettilikke degen talaby memlekettik saıasattyń negizgi tiregine aınaldy.
«Qazirgi tańda ádilettilik qaǵıdasyn ómirdiń barlyq salasyna engizý úshin tabandy jumys júrgizilip jatyr. Osy ortaq maqsatty iske asyrýda bizge ult bolyp uıysý qajet. Bul – memlekettilikti nyǵaıtý jáne qasiretti kúnderdiń qaıtalanbaýy úshin asa mańyzdy mindet», dep qosty M.Áshimbaev.
Onyń atap ótýinshe, qazaqstandyqtar bul oqıǵany árdaıym sanada saqtap, odan sabaq alýǵa tıis.
«Qańtarda qaza bolǵandardyń rýhyna taǵzym etý – bizdiń azamattyq paryzymyz. Bul – eńseli eldiktiń jáne bekem birliktiń belgisi. Endi tarıhymyzda mundaı qaıǵyly oqıǵalar eshqashan qaıtalanbasyn», dep qorytyndylady Senat Tóraǵasy.
