Qostanaıda meshit ashyldy

Qostanaı qalasynyń 9-shy shaǵyn aýdanynda meshit ashyldy. Onyń ashylý saltanatyna elimizdiń bas múftıi Erjan qajy Malǵajy­uly bastaǵan Qazaqstan musylmandary dinı basqarmasy men Qazaqstan qajylary qaýymdastyǵynyń delegasııasy keldi. Erjan Malǵajyuly qostanaılyqtardy jańa meshittiń ashylýymen quttyqtady. Oblys ákimi Nuraly Sádýaqasov jurtshylyqqa qutty bolsyn aıta otyryp, ımandylyq úıiniń kóbeıýi óńirdegi halyqtar birliginiń, dostyqtyń, jaqsy ómirdiń de kepili ekenin aıtty. Ol oblystyń barlyq aýdandary men qalalaryndaǵy, eldi mekenderindegi meshitterdiń adamdarǵa rýhanı, adamger­shilik tárbıe beretin ımandylyq oshaǵyna aınalǵanyn da tilge tıek etti. Munan keıin el aqsaqaldary, zııaly qaýym ókilderi ıgi tilekter bildirdi. Bul HIH ǵasyrdyń aıaǵynda Qostanaı qalasynda ataqty aǵaıyndy mesenat Iаýshevtar salǵan aq meshitten keıingi ekinshi ımandylyq úıi bolyp sanalady. Jańa meshitti oblystaǵy belgili kásipker Tólegen Jaılaýbaev saldy. Meshittiń qurylysy ol basqaratyn «Kompanııa «Erlan» jaýap­kershiligi shekteýli seriktestigine 400 mıllıon teńgege tústi. Tólegen Ǵalym­januly meshittiń sımvoldyq kiltin oblys­taǵy Maral ıshan atyndaǵy meshittiń ımamy Asylbek qajy Túsipbekovke tabys etti. Jańa meshittiń ımamy Shoqan qajy Ámirhanov qonaqtardy meshittiń ishin aralap kórýge shaqyrdy. Meshittiń ashylý saltanatyna oraı kásipker Tólegen Jaılaýbaev túıe soıyp, jınalǵan jamaǵatqa as berdi. Názıra JÁRIMBETOVA, «Egemen Qazaqstan». QOSTANAI.