Fransýz elshisi ınstıtýt qonaǵy boldy

Qostanaı memlekettik pedagogıka ınstıtýty men Fransııanyń Qazaqstandaǵy elshiligi arasynda tyǵyz baılanys ornaǵan. Ol kezdeısoq emes. Elimizde fransýz tili mamandaryn jalǵyz osy bilim ordasy ǵana daıyndaıdy. Sonymen qatar, munda fransýz mádenıetin tanytatyn kóptegen sharalar júrgiziledi. Instıtýt janynda qazaq-fransýz mádenı ortalyǵy birneshe jyldan beri jumys isteıdi. Akademııalyq qarym-qatynasty damytý aıasynda jylyna 7 stýdent Perpınıan qalasyndaǵy Vıa Domısıa ýnıversıtetinde oqyp keledi. Instıtýtta fransýz mádenıetine arnalǵan baıqaýlar, eltanýǵa arnalǵan zertteý jobalary júzege asyrylady. Bolashaqta ınstıtýt fransýz tilin úırenýdi damytýdyń Qazaqstandaǵy ınno­vasııalyq-ádisteme ortalyǵyna aınalatyn bolady. Fransýz mádenıetin taratýǵa qosqan zor úlesi úshin ınstıtýt rektory Qýat Baımyrzaev ústimizdegi jyldyń mamyr aıynda Fransýz Respýblıkasynyń mádenıet, bilim jáne ǵylym salasyndaǵy joǵary nagradasy – Akademııalyq palma ordenimen marapattalǵan edi. Fransııanyń Qazaqstandaǵy Tótenshe jáne ókiletti elshisi Fransıs Eten myrza bilim ordasyna arnaıy kelip, óz halqynyń mádenıetine qatysty jáne fransýz tili muǵalimderin daıyndaýǵa baılanysty júrgizilip jatqan jumystardyń kýási boldy. Elshi osy saparynda stýdentterge Fransııa tarıhy, fransýz tiliniń damýy jáne qazirgi ýaqytta onyń álemdik til retinde alatyn orny týraly leksııa oqydy. Fransıs Eten árkimniń ózin búgingi qoǵamda tulǵa retinde qalyptastyra bilýdegi jáne bilim keńistigindegi til bilýdiń mańyzyn atap aıtty. Leksııa stýdentterdiń úlken qyzyǵýshylyǵyn oıatty, ol jastardyń elshimen fransýz tilindegi tikeleı áńgimesine ulasty. Elshi qostanaılyq stýdentterdiń fransýz tilinde erkin sóıleýine, olardyń bilimine tańdanysyn bildirdi. Bolashaq muǵalimderdiń kásiptik jáne tildik daıyndyǵyn pysyqtaý úshin stýdentter mundaı kezdesýlerdiń jıi bolǵanyn qalaıtyndyqtaryn jetkizdi. Názıra JÁRIMBETOVA, «Egemen Qazaqstan». QOSTANAI.