Senatorlar magıstraldy jylý qubyryn tekserý kezinde ınjenerlik kommýnıkasııalardyń jaı-kúıin tekserdi. Depýtattar qys mezgilinde jylý energetıkalyq kompanııalardyń úzdiksiz jumys isteýiniń mańyzdy ekenin atap ótti.
«Parlament Senatynyń barlyq depýtattary qazir problemalyq nysandarmen tanysýǵa, sondaı-aq turǵyndardy alańdatyp otyrǵan máselelerdi sheshýge kómektesý úshin óńirlerdi aralap júr. Tarazda apatty dep tanylǵan negizgi nysandar – M-1 jáne M-3 jylý qubyrlary bolyp otyr. Olardy jóndeýdiń jalpy quny 14-16 mıllıard teńgeni quraıdy. Biraq másele oblys ortalyǵynyń turǵyndaryn jylýmen qamtýǵa qatysty ekenin eskersek, bul jumysty mindetti túrde júrgizý kerek dep esepteımin», dep atap ótti Bekbolat Orynbekov.
Kezdesý barysynda arnaıy komıssııa jumysynyń nátıjeleri boıynsha «TarazEnergoSentr» AQ-da jabdyqtyń 80%-dan astamy tozǵany tirkelgeni jáne osyǵan baılanysty JEO-ǵa «qyzyl» mártebe berilgeni atap ótildi. Sonymen qatar oblysta jylý qýatynyń tapshylyǵy máselesi de kúrdeli bolyp otyr. JEO men qubyrlardyń qazirgi jaǵdaıyna qarasaq, olarǵa jańa abonentterdi qosý múmkin emes. Munyń bári Tarazdyń jylý qubyrlaryna jańǵyrtý jumystaryn júrgizýdiń mańyzdylyǵyn kórsetedi.
«Bul máselelerdiń respýblıkalyq deńgeıde qaralýy úshin qajetti barlyq qujattar ótken jyldyń ekinshi toqsanynda daıyndalýy kerek bolatyn. Iаǵnı qujattar isterdiń qazirgi jaı-kúıi qalypty tártipte bolǵanda ǵana 2024 jyldyń basynda maquldanatyn edi. Alaıda búgingi tańda oblys ortalyǵyn jylýmen jabdyqtaýǵa basymdyq berilip otyr. Sondyqtan biz bul máseleni shuǵyl túrde sheshýge kómektesýge tyrysamyz», dedi senator Ábdáli Nuralıev.
Sondaı-aq senatorlar oblys ortalyǵynyń «Baryshan» turǵyn alabyndaǵy jańa mektebine de baryp, Talas ózeni arqyly ótetin kópirdiń jaı-kúıimen jáne jaǵalaýdy nyǵaıtý jumystarymen tanysty.
