Kásipkerlik qyzmetti bastaýǵa nıet bildirgen nemese kásipkerlikpen aınalysatyn 21-35 jas aralyǵyndaǵy jastarǵa shaǵyn nesıeler konkýrstyq negizde beriledi.
Nesıe «Agrarlyq nesıe korporasııasy» AQ arqyly júzege asady. Nomınaldy syıaqy mólsherlemesi jyldyq 2,5%-dan aspaıdy. Nesıeniń maksımaldy somasy 5 mıllıon teńgegeni quraıdy, sondaı-aq kepilzattyń bolýy mindetteledi.
Shaǵyn nesıelerdi kez kelgen maqsat úshin 5 jylǵa, al mal sharýashylyǵyna 7 jylǵa deıingi merzimge alýǵa bolady.
Sondaı-aq negizgi bereshek pen syıaqyny óteý boıynsha jeńildik kezeńi kózdelgen, ol shaǵyn nesıeleý merzimi uzaqtyǵynyń 1/3 (úshten birinen) aspaıdy.
Qazirgi ýaqytta mınıstrlik jergilikti atqarýshy organdarmen nesıelik sharttar jasasý, «Agrarlyq nesıe korporasııasy» AQ-men jergilikti atqarýshy organdardy bekitýge shart jasasý, sondaı-aq bıznes-jobalardy qaraý úshin óńirlik komıssııalar qurý boıynsha jumys atqaryp jatyr.
