Finprom derekterine qaraǵanda, óńirler boıynsha eń kóp tabys elorda turǵyndaryna tıesili: jan basyna shaqqanda ortasha eseppen 339 myń teńge - bir jyl burynǵydan 15,7% artyq.
Ekinshi orynǵa Qaraǵandy oblysy jaıǵasty: 332,3 myń teńge, 21,4%-ǵa ósken. Úzdik úshtikke Shyǵys Qazaqstan oblysy kirdi: 312,7 myń teńge, jyldyq ósim - 31,8%.
Anyqtalǵandaı, eń tómengi tabys Túrkistan oblysynyń turǵyndarynda: jan basyna shaqqanda nebári 156,4 myń teńge, bul bir jyl burynǵydan 15,6% kóp.
Qazaqstandyqtardyń 76,3%-y tabysynyń basym bóligin eńbek qyzmetinen tapty: 180,4 myń teńge - bir jyl burynǵydan 21,9% artyq. Onyń 157,2 myń teńgesi - jaldamaly jumys isteýden, 23,2 myń teńgesi - ózin-ózi jumyspen qamtýdan jáne kásipkerlik qyzmetten túsken kirister.
Áleýmettik aýdarymdar bir jylda 3,3% ǵana ósip, 55,1 myń teńgeni quraǵan. Onyń 44,8 myń teńgesi zeınetaqy, 9,1 myń teńgesi járdemaqy, 1 myń teńgesi shákirtaqy, 239 teńgesi AÁK jáne turǵyn úı kómegi boldy.
Sondaı-aq týystar men jaqyndardyń materıaldyq kómegi, alıment tólemderi 6,2%-ǵa ósip, 5,5 myń teńgeni qurady.
