Abyroı bolǵanda tótenshe jaǵdaılar departamentiniń qyzmetkerleri qulaǵdar bola sala atqa qonǵan. Áıtse de, aq tútek boran alǵa umtylǵan qadamdy keri serpip, qarǵa adym jer jyljýdyń ózi muń bolǵan shaqta jan jylytar járdem qolyn sozǵanymen, dittegen jerge jetýdiń ózi ońaı emes.
Oqıǵa bylaı órbigen eken. Tórt jolaýshy «Nıva» avtokóligimen Ereımentaý qalasynan shalǵaıdaǵy Masaqpaıǵa sapar shekken.
– Biz shyqqanda kún ashyq edi, – deıdi jolaýshynyń biri Talǵat Baıtemirov, – qaıtarda boran kóterilip ketti. Jol jabyldy. Ymyrt úıirilgen soń tóńirekti boljaýdan qaldyq. Keshki saǵat toǵyzdan tańǵy tórtke deıin jol boıyndaǵy taý-teńiz qardy jantalasyp kúrekpen tazalap áreket etkenimizben óte almadyq.
«Qyrsyqqanda qymyran irıdi» degendeı, kóz baılanǵan soń jol sulbasyn anyq baǵdarlaı almaǵan jolaýshylar jol jıegine túsip ketken. Jarǵa jantaıa qulaǵan kólik isten shyqqan. Istiń nasyrǵa shapqanyn ańǵarǵan jolaýshylar ile qutqarý qyzmetine telefon shalyp, qaı jerde jolda qalǵandyqtaryn túsindirgen. Arada úsh saǵat ótkennen keıin telefon qýaty da óshken. Boranmen alysqan jolaýshylar da qajyǵan. Sýyq kóliktiń ishinde kózderi ilinip ketse kerek. Tańǵy saǵat segizdiń shamasynda oqıǵa ornyna jetken qutqarýshylar jol jıegindegi kóliktiń terezesin qaǵyp, jolaýshylardy oıatyp alyp, jyly kıindirip, ystyq shaı ishkizip, esterin jınatypty.
Anyq ajaldan aman qalǵan jolaýshylar bolsa aq tútek boranmen alysyp, bastaryn báıgege tigip, jan ushyryp jetken tótenshe jaǵdaılar departamentiniń jaýjúrek qyzmetkerleri Ilııas Áýbákirov, Qýan Aqylbekov, Baıyrly Kópenov jáne Saǵynysh Bilálovterge alǵystaryn jaýdyrdy.
Bul jolǵy oqıǵa shıelenisip shıryqqanymen, birshama sátti aıaqtaldy. Aıaq-qol tońǵanymen, bas aman. Biraq aldaǵy ýaqytta jolaýshy bitken qystyń qatal synshy ekenin esten shyǵarmasa eken deımiz. О́zderi ǵana emes, dúıim jurtty ábigerge salýdyń qajeti joq. Onyń ústine sońǵy táýlikterde kún eresen sýytyp tur. Al aıdalada aq boranda adasý ajaldyń sýyq qushaǵyna óziń tilenip barǵanmen birdeı.
Aqmola oblysy
