Qazaqstan men Úndistannyń qorǵanys mınıstrlikteri arasyndaǵy ekijaqty yntymaqtastyq josparyn iske asyrý sheńberinde ótkizilgen oqý-jattyǵý barysynda eki birikken aralas rota quryldy.
Qatysýshylar eki apta boıy kúrdeli, beıtanys jerde urys qımyldarynyń ártúrli elementterin pysyqtady.
Oqý-jattyǵý barysynda ınjenerlik-saperlik daıarlyq boıynsha sabaqtar ótti. Onda áskerı qyzmetshiler qoldan jasalǵan jarylǵysh qurylǵylardyń, tuzaqtardyń jáne basqa da jarylǵysh zattardyń úlgilerimen tanysty. Sondaı-aq qabyldaýshy tarap patrýldeýdi uıymdastyrý boıynsha demonstrasııalyq sabaq uıymdastyrdy.
Naqty tabıǵı jáne klımattyq jaǵdaılarda baǵdarlaý jáne ómir súrý erejelerine erekshe nazar aýdaryldy. Al negizgi kezeń barysynda áskerı qyzmetshiler Djýnglı jaǵdaıynda oqý-jaýyngerlik mindetterdi oryndady. Fal boıynsha tikushaqtan qonǵannan keıin jaýyngerler qarý-jaraqpen jumys istedi.
Sonymen qatar oqý-jattyǵý sheńberinde salmaǵy 10 kelilik qarý-jaraqpen jáne qural-jabdyqtarmen 6 shaqyrym qashyqtyqty eńserý boıynsha tózimdilik jarystary uıymdastyryldy. Márege birinshi bolyp Gvardeısk garnızony tankıster quramasynyń vzvod serjanty Aldııar Muhamadıev keldi.
Qazaqstandyq tarap ókilderi atap ótkendeı, «KazInd-2022» birlesken oqý-jattyǵýyna qatysý áskerı qyzmetshilerge Úndistannan kelgen áriptesteriniń jaýyngerlik daıarlyq ádistemesimen tanysýǵa, ózderiniń jaýyngerlik daǵdylaryn arttyrýǵa jáne múldem beıtanys jerlerde kásibı sheberlikterin kórsetýge múmkindik berdi.
Aıta ketý kerek, bıyl «KazInd» qazaqstandyq-úndilik oqý-jattyǵýy tórtinshi ret ótkizildi. Mundaı oqý-jattyǵý alǵash ret 2018 jyly Jambyl oblysynyń «Mátibulaq» polıgonynda ótken edi. Odan keıin 2019 jyly Úndistannyń Ýttarakhand shtatynda, al 2021 jyly «Ońtústik» óńirlik qolbasshylyǵynyń «Aısha-bıbi» polıgonynda birlesken manevrler ótkizildi.
