Oblys ákiminiń orynbasary Jasulan Bısembıevtiń aıtýynsha, byltyr Atyraý óńirine kelip jumys isteýge 9 pedagog nıet bildirgen. Jaqynda elimizdiń ár óńirinen kelgen muǵalimderdiń beseýine páter berildi. Olardyń arasynda Batys Qazaqstan oblysynan tarıh pániniń muǵalimi Aınagúl Erejepova, fızıka pániniń muǵalimi Valentın Kozlov, Shyǵys Qazaqstan oblysynan tarıh pániniń muǵalimi Symbat Qabysheva, Aqtóbe oblysynan Qaısar Nurtanov, bastaýysh synyp muǵalimi Gúlúzim Amangeldi bar. Muǵalimderdiń alańsyz jumys isteýine barlyq jaǵdaı jasalǵan. Olarǵa arnaıy baǵdarlamaǵa sáıkes laýazymdyq jalaqysyna 150 paıyz mólsherindegi qosymsha yntalandyrý aqysy tólenip otyr.
Máselen, Valentın Kozlov Atyraý qalasyndaǵy J.Qarajigitov atyndaǵy №16 mektep-lıseıine jumysqa ornalasqan. Bul – munaıly shahardaǵy aralas mekteptiń biri.
– Biz muǵalim mamandyǵyn tańdaǵandyqtan, sanaly, bilimdi urpaq tárbıeleýdi maqsat ettik. Shákirtterimiz úzdik oqýymen tanylyp, túrli saıystardan júldeli oryndardy ıelense, biz úshin úlken mártebe bolar edi. Atyraýǵa osyndaı oımen kelgen edik. Bizge jergilikti basshylar tarapynan baspana berilip, úlken qoldaý kórsetilip otyr, – deıdi Valentın Kozlov.
Atyraý oblysy
