«Ishki ónimniń ósimi 3,1 paıyzǵa jetip, ınvestısııa kólemi 7,8 paıyzǵa artqan. Ekonomıkanyń barlyq salasy damyp keledi. О́ńdeý ónerkásibindegi óndiris deńgeıi 3,4 paıyzǵa, qurylys kólemi 9,4 paıyzǵa, aýyl sharýashylyǵy óniminiń kórsetkishi 9,1 paıyzǵa ósti. Syrtqy saýda aınalymy 33,4 paıyzǵa ósti. Saýda balansy aıtarlyqtaı nyǵaıyp keledi. Bul rette óńdelgen taýarlar eksporty 33,8 paıyzǵa ósip, 24,1 mıllıard dollarǵa jetti», dep baıandady E.Jamaýbaev.
Mınıstrdiń aıtýynsha, Respýblıkalyq bıýdjettiń kirisi jónindegi jospar 309 mıllıard teńgege asyra oryndalǵan.
Sondaı-aq Prezıdentke Bıýdjet jáne Salyq jańa kodeksteriniń ázirlený barysy, «Ulttyq qor – balalarǵa» jobasynyń jumys mehanızmderi, zańsyz ıelengen jáne elden shyǵarylǵan aktıvterdi memleketke qaıtarý úshin qabyldanyp jatqan sharalar týraly aqparat berildi, jeke tulǵalardyń bankrottyǵy týraly Zańnyń júzege asyrylýy týraly aıtyldy.
Memleket basshysynyń tapsyrmasyna sáıkes, sybaılas jemqorlyqqa qatysty qylmystyq ister boıynsha tárkilengen qarajat «Bilim berý ınfraqurylymyn qoldaý qoryna» jiberilip jatyr. Qazirgi kezde arnaıy shotta jınalǵan 120 mıllıard teńgege jýyq qarajat mektepterdiń qurylysy men jóndeý jumystaryna jumsalady.
Kezdesý sońynda Qasym-Jomart Toqaev bıýdjet qarajatyn tıimdi paıdalanýǵa, memleket qarjysynyń jaǵdaıyn jaqsartýǵa, sondaı-aq salyqtyq jáne kedendik ákimshilendirý isin jetildirýge baǵyttalǵan birqatar tapsyrma berdi.
