Qazaqstan Sýretshiler odaǵynyń múshesi, keskindemeshi, Qazaqstan balalar kórmesiniń kýratory Bolat Hamzınniń aıtýynsha, «Art palette» qoǵamdyq qory birneshe jyl boıy Qazaqstan Mádenı dıplomatııasy halyqaralyq qaýymdastyǵymen yntymaqtastyqta balalardyń sýretterin shetelderde nasıhattaýmen aınalysyp keledi. О́tken jyly atalǵan qor tarapynan balalar shyǵarmashylyǵy jobasy ázirlenip, «Búkil álemde – beıbitshilik» uranymen «Uly Jibek joly» aıasynda kóshpeli kórme bastaý alǵan bolatyn.
Osy joba boıynsha ótken jyly Parıjdegi Lývr mýzeıinde ótken álem balalarynyń sýret kórmesinde Qazaqstan jáne Qyrǵyzstan jetkinshekteriniń de týyndylary qoıyldy. Bul kórme ónertanýshylar tarapynan joǵary baǵasyn alyp, aldaǵy ýaqytta «Uly Jibek joly» aıasynda Ortalyq Azııa elderi men Túrkııada jalǵasyn tabatyn bolady.
«Jobaǵa Qazaqstan balalarynyń belsendi qatysýy erekshe nazar aýdarýdy qajet etedi. Sýret arqyly balalar qorshaǵan ortaǵa kózqarasyn, ishki kóńil-kúıin bildire alady. Olar salǵan sýretterde ádebıet, mýzyka, fılosofııa jıyntyǵy, adamı qundylyqtar kórinis beredi. Osy oraıda talantty da talapty balalarǵa týǵan ólkesin ǵana emes, álemdi tanýǵa múmkindikter qarastyrý olardyń shyǵarmashylyq turǵydan damýyna yqpal etedi», deıdi B.Hamzın.
Zarına Báımenova, Arına Erbolqyzy, Dárigúl Tańatarova, Aıajan Aqyltaı, Quralaı Ámirhan, Alına Jeksembek, Álibek Qadyrov, Asqar Beıshekeev, Aqbota Taýsova, Damıra Saǵynaı, Mansur Shákirjan, Raınaz Kúshkimbaeva, Mırash Tastemirova, Almas Erler, Damıra Raınaz, t.b. kóptegen balanyń sýretteri búginde «Myń boıaýly álem», IýNESKO-nyń «Mádenıettter men dástúrler toǵysynda» halyqaralyq konferensııasy aıasyndaǵy balalar sýretteriniń kórmesine qoıylyp, sertıfıkattarǵa ıe bolǵan.
Búginde Qazaqstan balalar sýretteriniń shyǵarmashylyq qorjyny jańa týyndylarmen tolyǵyp, halyqaralyq beıbitshilik mıssııasyndaǵy rólin kúsheıtýge yqpal etip keledi.
ALMATY
