Alystan kóz tartatyn sáýletti ortalyq «Aýyl – el besigi» baǵdarlamasy aıasynda salyndy. Qurylys jumystary eki jyl buryn bastalǵan bolatyn. Igilikti iske respýblıkalyq jáne jergilikti bıýdjetten 400 mln teńge qarajat bólindi. Bir aıta keterligi, etek-jeńi keń pishilgen osynaý eldi mekende jastarǵa qyzmet etetin mundaı ortalyq buryn-sońdy bolmaǵan. Qazir munda bir mezgilde 200-den astam adam sporttyq-gımnastıkalyq, mýzykalyq úıirmelerge qatysa alady. Qatysýǵa aýyl turǵyndary da yntaly. 125 adamǵa laıyqtalǵan kórermen zaly bar.
– Aýyl jastarynyń qýanyshynda shek joq, – deıdi jastar ortalyǵynyń mádenı jumystardy uıymdastyrýshysy Shánııa Quljabaı. Aldaǵy ýaqytta jas tolqynnyń kókiregin sáýlelendirip, rýhanı nár berip, ıgilikti isterge jumyldyratyn bolamyz.
Bir jaqsysy, aýyldyń 12 adamy jumyspen qamtylyp otyr. Ári osy jerde servıstik ákimshilik te ashylǵan. Bul el Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn júzege asyrý dep bilgen jón. Buryn mundaı jobalar oblys ortalyǵy men iri qalalarda ǵana kezdesetin bolsa, endi shalǵaıdaǵy shaǵyn aýyldarda da ashylyp jatyr. Jaǵymdy jańalyqtyń nátıjesinde aýyl turǵyndary ózderin tolǵandyryp júrgen árqıly saýaldar oraıynda jyldam ári sapaly keńes ala alady. Aınalyp kelgende bar sharýa ońynan ońǵarylyp, el ishindegi yntymaq sútteı uıyp turmaı ma?!
Aqmola oblysy,
Atbasar aýdany
