Mınıstr usynystardy, atqarylyp jatqan jumystar týraly aqparatty tyńdap, negizgi mindetterdi atady.
Keńeste Bilim salasynda sapany qamtamasyz etý komıtetiniń tóraǵasy Ernur Dáýenov baıandama jasap, mınıstrlikke qoǵamnan kóptegen ótinish túsip jatqanyna toqtaldy. Onyń aıtýynsha, bul jergilikti atqarýshy organdardyń máselelerdi der kezinde sheshpeı otyrǵanynyń belgisi.
«2022 jylǵy qarashada mınıstrlik «Pedagogti qorǵaý» Telegram-chatyn iske qosty. 2 aıdyń ishinde chatqa 33 myń adamnan 5 myńǵa jýyq ótinish túsken. Suraqtardyń basym bóligi saǵattardy bólýge, attestasııa, muǵalimderdi mindetinen tys qyzmetke tartýǵa, olardan shamadan tys esep berýdi talap etýge, eńbekaqy tóleýge qatysty. Osyǵan baılanysty bilim bólimderi muǵalimder arasynda túsindirý jumystaryn kúsheıtýi qajet», dep aıtty Ernur Dáýenov.
