«Astana tańdaýy» taǵy da óziniń tańdaýyn jasaǵaly tur

Dástúrli «Astana tańdaýy» baıqaýy bıyl qatarynan úshinshi jyl uıymdastyrylyp otyr. Jyl ótken saıyn órisi keńeıip, bedeli bıiktep kele jatqan atalǵan baıqaý tanymal sharalardyń qataryna qosylyp úlgerdi. Eske sala keteıik, «Astana tańdaýy» alǵash ret elorda ákimi Imanǵalı Tasmaǵambetovtiń bas­tamasymen 2012 jyly ótki­zilgen bolatyn. Sodan beri baı­qaýda júzdegen úmitker baqtaryn synap kórdi. Olarǵa myńdaǵan adam daýys berdi. Máselen, 2013 jyly «Astana tańdaýy» saıysyna túsken talapkerlerdi 87 myńnan astam adam qoldap ún qatqan. Bul – baıqaý tarıhyndaǵy rekordtyq kórsetkish. Al bıylǵy ótkizilip jatqan synǵa tek qazaqstandyqtar ǵana emes, Reseı jáne О́zbekstan sekildi kórshi memleketterdiń turǵyndary da qoldaý bildirýde. Bul árıne, atalǵan sharanyń tanymal bolyp otyrǵandyǵyn bildirse kerek. Endi bıylǵy «Astana tań­daýy-2014» baıqaýy jóninde az-kem maǵlumat bere keteıik. «О́z tańdaýyńdy jasa, eń úzdi­gin anyqta!» uranyn tý etken dástúrli synaqta áleýmettik ma­ńyzy zor mamandyqtardyń úzdik­teri anyqtalady. Onda pedagogtar, dárigerler, jol salýshylar, energetıkter, qoǵamdyq kólik júrgizýshileri, ýchaskelik ınspektorlar men qurylysshylar ózara saıysqa túsedi. Ústimizdegi jyldyń 7 sáýi­­rinen bastap 31 mamyrǵa deıin­ baı­­qaýǵa qatysýǵa nıet bil­dir­genderden ótinish qabyldan­ǵan. Sońǵy málimetke qaraǵanda, jeti atalym boıynsha 250 adamnan ótinish túsipti. Munyń ózi ótken jyldarmen salystyrǵanda, bıyl­­­ǵy saıysqa qatysýshylardyń ál­deqaıda kóp ekenin kórsetedi. Budan báseke óte tartysty óteti­nin ańǵaramyz. Túrli mamandyqtar boıynsha úzdikterge daýys berý 1 maýsymnan­ beri qyzý júrgizilýde. Ol 20 maý­symǵa deıin jalǵasady. Osy jerde eskerte keter jaıt, árbir turǵyn Astana qalasy ákimdiginiń saıtyna kirip, bir elektrondy mekenjaıdan bir ǵana daýys bere alady. Qazirgi tańda daýystar sanyna qaraı birneshe úzdikter belgili bola bastaǵan. Máselen, keıbir pedagogtar 10 myńnan astam adam daýys jınap úlgeripti. Al daýys berýdiń qorytyndysy 20 maýsymda jarııalanbaq. Negizinen «Astana tańdaýy» qalalyq baıqaýynyń bereri mol. Bul sharany uıymdastyrýdaǵy maqsat jastarǵa kásiptik baǵyt-baǵdar berý, áleýmettik mańy­zy zor mamandyq ıeleriniń qoǵamy­myzdaǵy ornyn baǵalaý bolyp tabylady. Taǵy bir nazar aýdararlyq jaıt, «Astana tańdaýy-2014» baıqaýynyń jeńimpazdaryna arnaıy kýboktar jáne maqtaý qaǵazdar tapsyrylady. Sondaı-aq, óz isiniń bilgirlerin nasıhat­taý maqsatynda úzdikter týraly derekti fılmder túsirilip, bıl­bordtarǵa olardyń sýret­teri ilinbek. Budan bólek, jeńim­paz­dar­dy baıqaýdy uıymdas­ty­rýshylar tarapynan basqa da tamasha syılyqtar kútip tur. Onyń qandaı syı ekeni ázirge qupııa ustalyp otyr. Joldybaı BAZAR, «Egemen Qazaqstan».