Jarystyń alǵashqy kúninde Qazaqstan quramasynyń eki boksshysy sharshy alańǵa kóterilip, ekeýi de sary qurlyq básekesin jeńispen bastady. Birinshi bolyp rıngke shyqqan 48 kılodaǵy el chempıony, jastar arasyndaǵy álem chempıony, eresekter arasyndaǵy Azııa birinshiliginiń jeńimpazy Sanjar Táshkenbaı Qyrǵyzstan boksshysy Anýar Hodjıevpen qolǵap túıistirip, tóreshilerdiń biraýyz sheshimimen jeńiske jetti.
Sanjardyń izin ala Qazaqstan jankúıerleri 57 kılo salmaqtaǵy Mahmud Sabyrhannyń ónerin tamashalady. Buǵan deıin 54 kıloda álem chempıonatynyń (2021) jáne Azııa birinshiliginiń (2022) kúmis júldesin ıelengen otandasymyz jastar arasyndaǵy bıylǵy dodada jańa salmaqta baq synap jatyr. Mahmud alǵashqy aınalymda О́zbekstan ókili Mırzabek Mırzahalılovpen judyryqtasyp, 5:0 esebimen bet qaratpaı jeńdi.
Aıta keteıik, jerebe qorytyndysy boıynsha, jastar arasyndaǵy Azııa birinshiligin úsh boksshymyz (Serik Abzal (67 kg), Erhat Bekzat (92 kg), Amanat Sabyrǵalı (+92 kg) jartylaı fınaldan bastaıdy. Bul – qurama qorjynynda kem degende 3 qola júlde bar degen sóz.
