Alma-mater qabyrǵasynda alǵash ret túlekterdiń «Samǵaý» forýmy ótti. Negizgi maqsat – Nazarbaev zııatkerlik mektep túlekteriniń oqýshylarǵa kásiptik baǵdar berýin qoldaý. Túlekter men oqýshylar arasyndaǵy biregeı dıalog alańyna NIS Túlekter qaýymdastyǵynyń bastamasymen 300-den astam qatysýshylardy jınady.
Atalǵan jıynda 10-synyp oqýshysy, forým spıkerleriniń biri Erkebulan Mıllat pen 2021 jylǵy túlegi Ánýar Rysbek sóz sóılep, bolashaqtaǵy josparlarymen bólisti.
Búginde Ánýar – Majarstannyń Debresen ýnıversıtetiniń avıasııa fakýltetiniń 1-kýrs stýdenti. Ol óz sózinde NIS qalyptastyrǵan mýltıtaskıng, psıhoemosıonaldy jaǵdaıdy baqylaý, taım-menedjment syndy daǵdylar ýnıversıtette úzdik stýdentterdiń biri bolýyna kómekteskenin basa aıtty.
2018 jyldyń túlegi Anton Morgýnovtyń sózi oqýshylar arasynda erekshe qyzyǵýshylyq týdyrdy. Ol birden AQSh-tyń bes úzdik ýnıversıtetine shaqyrtý alǵan. Qazirgi ýaqytta MIT-tiń (Massachýsets tehnologııalyq ınstıtýty) 4-kýrs stýdenti. Sondaı-aq ol Qazaqstandaǵy mektep oqýshylary úshin tegin onlaın sabaqtar ótkizetin Beyond Curriculum bilim berý onlaın platformasynyń negizin qalaýshy.
«Samǵaý» forýmynyń paıdasy zor. Bul – tańdaýly ýnıversıtetterge túsýdiń egjeı-tegjeıi, sondaı-aq mamandyq tańdaýda ne nársege nazar aýdarý kerektigi týraly bilý múmkindigi. Mysaly, meni hımıkke matematıkanyń tereń quraldary qanshalyqty qajet bolatyny tań qaldyrdy», deıdi A. Morgýnov.
Jıyn barysynda áıgili «Barqyt lıgasyna» engen Garvard ýnıversıtetiniń 2-kýrs stýdenti Sezim Ertanatov paıdaly keńesterimen bólisip, árbir oqýshynyń «Garvardqa qalaı túsýge bolady?» degen kókeıindegi saýalyna jaýap berdi.
«Oqýdaǵy jetistikterim, kóshbasshylyq qasıetterim, úlken jumys qabiletim josparymdy júzege asyrýǵa múmkindik berdi. Garvardqa túsý kezdeısoq jaǵdaı emes, tynymsyz eńbektiń nátıjesi. Qol jetpes asý joq, arman bolsa oryndalmaıtyn eshnárse joq», dep túıindedi Sezim sózin.
«NIS túlegi esimin alyp júrý men úshin úlken mártebe. Búgin spıker retinde sóz sóılep, tájirıbemmen bólisýdiń biregeı múmkindigine ıe boldym. Men – bolashaq dıplomatpyn, yntymaqtastyq, azamattyq jaýapkershilik, qazaqstandyq patrıotızm sııaqty qundylyqtar mende de, mamandyǵymda da oryn taba alatyny sózsiz», deıdi 2021 jyldyń túlegi, Ál-Farabı atyndaǵy QazUÝ 1-kýrs stýdenti Ajar Abıtaeva.
Forýmnyń arnaıy sessııasynda zııatker oqýshylar túlekterdi ózderiniń ǵylymı, áleýmettik, shyǵarmashylyq jáne IT jobalarymen tanystyrdy.
Jetisý oblysy
