Qazir oblysta 208 dáriger jetispeıdi. Oblys ákimi Aıdarbek Saparov óńirge dárigerlerdi tartýdyń josparyn ázirleý qajet ekenin atap ótti.
Densaýlyq saqtaý basqarmasynyń basshysy Qumar Kósemisov soltústikqazaqstandyq dárigerlerdiń joǵary biliktiligi olardy básekege qabiletti jáne respýblıkalyq mańyzy bar qalalarda suranysqa ıe etetinin atap ótti. Jas mamandar men basqa oblystardan kelgender baspananyń joqtyǵynan, turmystyq jetispeýshilikten keri ketip jatyr. Bul ásirese aýyldyq jerlerge qatysty bolyp otyr.
«2021 jyldan bastap qalalyq medısınalyq uıymdarǵa jumys isteý úshin kelgen medısına mamandaryna 1,5 mıllıon teńge, al aýdandyq mekemelerge 2,5 mıllıon teńge járdemaqy berilip júr. Jas mamandar «Dárigerler úıinde» jaldamaly baspanamen qamtamasyz etilse, medısına qyzmetkerleri «7-20-25» ıpotekalyq turǵyn úı baǵdarlamasy men «Nurly jer» baǵdarlamasyna qatysa alady. О́tken jyly 126 dárigerge jalpy somasy 232 mıllıon teńgege kóterme járdemaqy tólendi. Aqpan aıynda taǵy 41 dáriger járdemaqy alady», dedi Q.Kósemisov.
Ol medısınalyq uıymdardyń basshylary jas mamandarǵa 1 mıllıon teńgeden 3 mıllıon teńgege deıin járdemaqy tóleıtinin, turǵyn úıdi jalǵa alý qunynyń 50 paıyzyn óteıtinin qosa aıtty.
Q.Kósemisovtyń aıtýynsha, qańtar aıynan bastap oblys delegasııalary medısınalyq joǵary oqý oryndaryna baryp, túlekterdi jumysqa shaqyrady.
