О́rttiń tutanýyna Aleksandr Repeıko esimdi traktor júrgizýshisi kináli bolyp shyqty. Qylmystyq istiń deregi boıynsha, 2022 jyldyń 2 qyrkúıeginde ormanda aǵash daıyndap júrgen qaraǵaıshy R.Esmaǵanbetov traktorshyǵa aqysyn tóleıtinin aıtyp, Baǵanaly aýylynan Basaman orman sharýashylyǵynyń №22 telimine vagon jetkizip berýin suraıdy. A.Repeıko kelisimin beredi. Alaıda mehanızator júrgizip júrgen traktordyń ushqyn sóndirgishi bolmaǵan. Oǵan qosa traktordyń sılındri men porsheninde de aqaý bolǵan.
Traktorshy mejeli jerdiń alys ekenin bile tura, aýa raıynyń aptap ystyǵy men jeldiń údeı bastaǵanyna qaramastan, traktoryna ushqyn sóndirgish ornatpastan, álgi vagondy artyna tirkep alyp jolǵa shyǵyp ketedi. Osylaısha, jol boıy artynan ot shashyp kele jatqan traktordyń ushqyny tıgen qaý lap ete qalyp, aınala áp-sátte qyzyl jalynǵa oranǵan. О́rekpigen jelge ilesken tilsiz jaý el es jıyp bolǵansha ormandy sharpyp, eldi mekenderge enedi.
Saldarynan joıqyn órt 40 myń gektarǵa jýyq ormandy-dalaly alqapty typ-tıpyl etip, 18 mlrd 774 mln 283 myń 323,73 teńge shyǵyn keltirgen. Oǵan qosa, 91 turǵyn úı, 4 shaǵyn bıznes nysany, 33 qora-qopsy, 20 avtokólik, aýylsharýashylyq jáne arnaıy tehnıka, 122 bas mal órtenip ketti. Bul shyǵyndardyń esebi – 642 mln 114 myń 735 teńge.
Alapat órtti sóndirý kezindegi arpalysqa memleket bıýdjetinen 2 mlrd 680 mln 640 myń 278, 37 teńge bólindi.
Aleksandr Repeıkonyń isi sotta Qylmystyq kodekstiń 204-babynyń 2-tarmaǵynda kórsetilgen «Otpen nemese qaýiptiligi joǵary ózge de kózdermen abaısyz jumys isteý arqyly jasalǵan ne aýyr zardaptarǵa ákep soqqan nemese asa iri zalal keltirgen dál sol is-áreket» jáne Qylmystyq kodekstiń 341-baby, 1-tarmaǵynda kózdelgen «Otqa salǵyrt qaraý saldarynan turǵyn úı mańyndaǵy, baý-baqsha ýchaskelerindegi aǵashtardy, sondaı-aq orman qoryna kiretin jáne kirmeıtin aǵash-butalardy joıý nemese zaqymdaý» qylmysy retinde qaraldy.
Aqyry aýdandyq sot A.Repeıkony bir jylǵa shartty túrde bas bostandyǵynan aıyrý týraly úkim shyǵardy. Al buǵan deıin qamaýǵa alynǵan Basaman orman sharýashylyǵynyń dırektory Ashat Jaqashovqa qatysty tergeý amaldary áli júrip jatyr.
Qostanaı oblysy
