Sýretti túsirgen avtor
Esterińizde shyǵar, toqsanynshy jyldary soǵym naýqanynda atshanamen úıdi-úıdi aralap, teri jınar edi ǵoı. Qoı men eshkiniń terisine deıin jınap alyp ketetin. Tarazyǵa salyp ólshep, salmaǵyna qaraı qun tóleıtin. Jún jınaý dástúri jáne bar-tuǵyn. Ol Semeıdiń teri-bylǵary kombınatynyń dúrkirep turǵan shaǵy shyǵar. Qazir bári qulaǵan, kúıregen. Semeıdegi trıkotaj fabrıkasy da toqyraýda toqtap tynǵan. Qazir qylaıaǵy shulyqty da shetten alamyz. Ásirese irgedegi Mońǵolııanyń túıe jún shulyǵyna japa-tarmaǵaı talasamyz. Tórt túligimizdi órgizip otyrǵanymen, terisi men júniniń kereksiz bolyp jatqany janǵa batady. Kókpekti aýdanynyń turǵyny Nurılá Maqym sekildi kásipkerler ár aýdannan seh ashyp, jún qabyldasa, az da bolsyn, óz ónimimizdi tutynar ma edik?!
2018 jyly kúzde memlekettik «Eńbek» baǵdarlamasy arqyly sonaý Taldyqorǵan oblysynan Kókpekti aýdanyna qonys aýdarǵan bul otbasy búginde kishigirim kásip bastap, nápaqalaryn aıyryp otyr. Nurılá Maqymnyń joldasy mal saýdasymen aınalyssa, ózi Kókpekti aýylynyń ortasynan tigin sehyn ashqan. Jýyqta seh jumysyn arnaıy baryp kórdik. Shaǵyn ǵana sur ǵımarat. Qurylysy tolyq aıaqtala qoımaǵan ǵımaratqa jylý tartyp úlgermepti. Kórpe, jastyq jınalǵan tigin sehynyń ishi ańyrap tur. Tabannan ótken syz mańdaıdy solqyldatady. Qystyń qaqaǵan aıazynda kún uzaq munda jumys isteý múmkin emes. Aıtýynsha, ázirshe eski júndi qaıta tútip, kórpe tigýmen aınalysady. Tapsyrysqa qaraı jastyq qaptap, basqa da usaq-túıek tigin tigedi. Al keler jyly halyqtan jún jınap, kásipti keńeıtýdi kózdep otyr. Qazirdiń ózinde jún tútýge arnalǵan eki apparat alyp qoıǵan. Qos apparatty qatar iske qossa, tonna júndi áp-sátte tútip shyǵatyn sııaqty. Júndi tútken soń kórpe basatyn apparaty jáne bar. Kórpege arnalǵan buldy kerip qoıyp, úlbiregen júndi mólsherlep tósep shyǵady eken. Sodan soń kóktep tikti, syryp tikti... Áıteýir, sút pisirim mezgilde bir kórpeniń jobasyn jasap qoıdy. Aıtýynsha, paıdalanyp otyrǵan qurylǵynyń bárin óz qarajatyna satyp alǵan. Ekibólmeli ǵımaratty da óz kúshterimen kótergen. Kásip ashý úshin berilgen memlekettik grant 580 myń teńge. Bul soma seh ashýǵa jetpegenimen, az da bolsa sep. Keıbir kásipkerler grant arqyly alǵan aqshany aınalymǵa salyp, sharýalaryn shyr aınaldyryp otyr. Árıne, tapqan tabys tańdaǵan kásip kózine baılanysty.
– Biz 2008 jyly Qytaıdan elge oraldyq. Taldyqorǵanda turyp, 2018 jyly «Eńbek» baǵdarlamasymen Kókpektige qonys aýdardyq. Aýdan ákimdigi shaqyrǵan soń joldasym kelip kórip ketti. Unady dedi. Biraq kóship kelgen jyldary qınaldyq. Balalarym aýyrdy, qysyldyq... Árıne, qarjylaı qoldaý boldy. Alaıda kásip ashý úshin jer surap edik, ala almadyq. Aýyldyń shet jaqtarynan ǵana usyndy. Keıin ózimiz satyp aldyq. Tigin sehyn ashý úshin 580 myń teńge qaıtarymsyz grant berdi. Tórtbalaly ana edim, taǵy da jeńildikter bola ma dep oılasam, joq eken. Sebebi bir balam kembaǵal, úkimet qaramaǵynda. Sondyqtan zań júzinde kópbalaly ana emes ekenmin, – deıdi kókpektilik kásipker Nurılá Maqym.
Jalpy, Kókpekti aýdanyna 2017-2021 jyldar aralyǵynda ózge oblystardan «Eńbek» baǵdarlamasy aıasynda 46 otbasy, ıaǵnı 171 adam qonys aýdarǵan. Olarǵa memleket tarapynan tıisti kómek kórsetilip, kásipterin dóńgeletýge bar múmkindik jasalǵan kórinedi.
Abaı oblysy
Kókpekti aýdany
