«Almatydaǵy saparym barysynda jýyrda ǵana qaıta qurylǵan «Qazaq gazetteriniń» ujymymen kezdestim. «Qazaq gazetteri» men «Egemen Qazaqstan» JShS-nyń birigý jumystary sátti aıaqtaldy. Sondyqtan «Qazaq gazetteri» dep atalatyn qurylym óz damýynyń jańa kezeńine aıaq basty dep aıta alamyz. Jańa qurylym jańa ǵımaratta jumysyn bastady. Ujym qyzmetkerleriniń jalaqysy, qalamaqysy men syıaqysy da ósti. Alda atqarylatyn jumys kóp», dep jazdy mınıstr áleýmettik jelide.
Osyndaı ózgeristerge baılanysty endigide «Egemen Qazaqstan», «Kazahstanskaıa pravda», «Ana tili», «Aqıqat», «Mysl», «Teńge monıtor», «Uıǵyr avazı», «Úrker», «Aqjelken», «Baldyrǵan», «Ulan», «Drýjnye rebıata» basylymdary bir shańyraqtyń astynda qyzmet isteıdi.
«Eki ujymnyń birigýine oraı «Qazaq gazetteriniń» Bas dırektory bolyp akademık Dıhan Qamzabekuly taǵaıyndaldy. Sondaı-aq belgili jýrnalıst Dýman Anash «Qazaq gazetteri» bas dırektordyń orynbasary – Almaty fılıalynyń basshysy, Erlan Júnis «Ana tili» gazetiniń bas redaktory jáne Asyl Saǵymbekov «Mysl» jýrnalynyń bas redaktory bolyp taǵaıyndaldy. Al talaı jyl jýrnalıstıka salasynda ónimdi qyzmet etken, eńbek sińirgen mádenıet qaıratkeri Shamshıdın Patteev aǵamyz jumystan bosaýǵa ótinish jazǵan edi. Aǵamyzǵa qajyrly qyzmeti úshin rızashylyq bildiremiz», dedi Darhan Qydyráli.
Sondaı-aq mınıstr óz ótinishimen qyzmetten bosaǵan Qazaqstannyń eńbek sińirgen qaıratkeri, qarymdy qalamger Qalı Sársenbaıǵa da jemisti eńbegi úshin alǵys bildirdi.
Kezdesý barysynda Aqparat jáne qoǵamdyq damý mınıstri «Drýjnye rebıata» basylymyn 90 jyldyq mereıtoıymen quttyqtady.
