IIDM basshysy sý tasqyny kezeńine daıyndyq erekshe baqylaýda ekenin, sondaı-aq yqtımal qaýipti ýaqtyly aldyn alyp, joıý úshin sý tasqynyna qarsy is-sharalar josparlary bekitilgenin, ortalyq jáne óńirlik deńgeılerde komıssııalar qurylǵanyn jetkizdi. Avtojoldarda táýlik boıy kezekshilik uıymdastyrylyp, jol qurylystaryna kúndelikti patrýldi baqylaý júrgizilip kele jatqany belgili boldy.
Aldyńǵy jyldardaǵy sý tasqyny mezgilindegi derekterdi eskere otyryp, respýblıkalyq avtojoldar jelisinde aıryqsha qadaǵalaýdy talap etetin 387 qaýipti ýchaske, 74 kópir jáne 818 sý ótkizý qubyry aıqyndaldy. Bul nysandarǵa 500-ge jýyq jol-tazartý tehnıkasy bekitilgen. Aqpan aıynan bastap 5 742 sý ótkizý qubyryn qardan tazartý boıynsha profılaktıkalyq jumystardy uıymdastyrý josparlanǵan.
«Qazir 13 myń tekshe metr qum, 3 myń tekshe metr tas, 11 myń tekshe metr qıyrshyq tas jáne qum-qıyrshyq tas qospasymen toltyrylǵan 15 myńdaı qap, sondaı-aq 244 myń lıtr jaǵarmaı daıyndaldy. Qajetti materıaldardyń daıyndyǵy 50% quraıdy. 15 aqpanǵa deıin qajetti materıaldardy daıyndaý 100%-ǵa deıin jetkiziledi», dedi mınıstr.
Vedomstvo basshysy keıingi 3 jylda avtokólik joldaryn jańǵyrtý jumystary aıasynda sý tasqyny qaýpi bar ýchaskeler sany 472-den 387-ge deıin azaıǵanyn atap ótti.
Marat Qarabaevtyń aıtýynsha, bul baǵyttaǵy jumys elimizdiń temirjoldarynda da myqtap qolǵa alyndy. Poıyzdardyń úzdiksiz qozǵalysyn qamtamasyz etý, sondaı-aq joldar men jasandy qurylystardy ýaqtyly daıyndaý úshin «QTJ» UK» AQ №957-SZ buıryǵyn bekitip, soǵan sáıkes sý tasqyny kezeńinde qajetti uıymdastyrý-tehnıkalyq is-sharalar qarastyrylyp otyr.
Aldyńǵy jyldardaǵy tájirıbeni taldaý negizinde barlyq óńir boıynsha 673 qaýipti oryn anyqtalyp, sý tasqyny kezeńinde atalǵan aımaqtarda táýliktik kezekshilik pen aınalma joldy uıymdastyrý kózdelgen.
Qazir elimizdegi sý qoımalary men agrotehnıkalyq bógetterdiń jaǵdaıyna tekserý bastalyp, kópirlerdiń, qubyrlardyń, drenajdyq qudyqtardyń sańylaýlaryn qardan tazartý, sol sııaqty taý jáne sý burý aryqtaryn, naýalar men jyralardy (kıývetterdi) ashý boıynsha daıyndyq jumystary júrgizilip jatyr. Sondaı-aq oblystyq TJ bólimshelerimen ózara is-qımyl boıynsha arnaıy sharalar pysyqtalýda.
«Shoıyntas pen rels paketteri, sondaı-aq kondısııasyz temirbetondy shpaldary qarastyrylǵan aǵynǵa qarsy 45 poıyz quramy jasaqtalyp jatyr. 61 myń adamdy evakýasııalaýǵa shaqtalǵan 1 713 lokomotıv pen 1 603 vagon daıyndaldy. Sonymen qatar 84 órt sóndirý poıyzy men qalpyna keltirýge arnalǵan kran, traktor jáne býldozer syndy tehnıkalar turaqty daıyndyqta tur. Qazir jol qashyqtyǵy boıynsha 2,4 myń tekshe metr tas pen 8 myń kondısııasyz temirbeton shpaldary daıyndaldy», dedi M.Qarabaev.
