Týrnırdiń resmı ashylý saltanatyna Mádenıet jáne sport mınıstri Ashat Oralov jáne Qazaqstan jeńil atletıka federasııasynyń prezıdenti Danıal Ahmetov qatysyp, saıysqa túsetin sportshylarǵa sáttilik tiledi.
«Bul jarystyń ózge týrnırlerge qaraǵanda jóni bólek. О́ıtkeni Halyqaralyq jeńil atletıka federasııasy jabyq keshendegi dodalardyń bedelin arttyrý maqsatynda 2016 jyly «Gaýhar lıgasynyń» negizinde osy jarysty uıymdastyrýdy qolǵa alǵan bolatyn. Sodan beri úzdiksiz ótkizilip keledi. Mine, jeti jyldan keıin halyqaralyq federasııa osy jarystyń bir kezeńin ótkizýdi Qazaqstan astanasyna senip tapsyrdy. Bıylǵy «Astana Silver Grand Prix Meeting» týrnırinde álemniń ár qıyrynan kelgen 15 eldiń sportshysy baq synaý múmkindigine ıe boldy. Jarysqa qatysýshy sportshylardyń bárine sáttilik tileımin», dedi federasııa prezıdenti Danıal Ahmetov.
Astanadaǵy «Qazaqstan» sport kesheninde ótken dúbirli dodada sportshylar jeńil atletıkanyń 10 túrinen ózara myqtyny anyqtady.
Baıraqty básekeniń shymyldyǵy erler arasynda 60 metrge kedergiler arqyly júgirý saıysymen túrildi. Bul synda Kýba ókili Rodjers Irıbarnnyń baǵy jandy. Ol atalǵan qashyqtyqty nebári 7.62 sekýndta júgirip ótti. Irıbarnnan úsh mıllısekýndqa qalyp qoıǵan otandasymyz Davıd Efremov (7.65) kúmis júldeni qanaǵat tutty. Davıd osy jarystyń irikteý kezeńinde 7.62 sekýnd nátıjesimen Qazaqstan rekordyn jańartqan bolatyn. Biraq resmı júgirýde ol óz nátıjesin qaıtalaı almady.
Al dál osy qashyqtyqta erkin júgirý saıysynda márege amerıkalyq Maıkl Rodjers (6.64) pen Demek Kemp (6.65) irkes-tirkes jetti. Úzdik úshtikti Portýgalııa ókili Frederıko Kýrvelo (6.75) qorytyndylady.
400 metrge júgirýde 2019 jylǵy Azııa chempıonatynyń qola júldegeri, birneshe dúrkin Qazaqstan birinshiliginiń jeńimpazy Mıhaıl Lıtvın (46.41) aldyna jan salmady. Ekinshi oryndy taǵy bir otandasymyz Andreı Sokolov (46.74) ıelense, brazılııalyq Aleksandr Rýsso (47.70) máre syzyǵyn úshinshi bolyp kesti.
800 metrge jarysta Horvatııa jelaıaǵy Marıno Blýdek 1 mınýt 48 sekýnd nátıjesimen dara shyqty. Kenııa ókili Nıkolas Kıplangatke (1:48.31) kúmis, Slovenııa sportshysy Jan Výkovıchke (1:48.72) qola júlde buıyrdy. 1500 metr qashyqtyqtyń altyn júldesi kenııalyq atlet Djarınter Mvasıage (4:14.26) buıyrdy. Kúmis pen qola medal efıopııalyq Hırýt Meshesha (4:14.40) men portýgalııalyq Kamıla Gomestiń (4:26.63) enshisinde ketti.
3000 metrde Efıopııa ókili Alı Abdılman (7:52.43) jeńimpaz atansa, Ulybrıtanııa ókili Aleksandr Djordj (8:07.55) pen Qazaqstan sportshysy Alekseı Gýsarov (8:27.10) márege ekinshi jáne úshinshi jetti.
Áıelder arasyndaǵy básekeler de asa tartysty ótti. Máselen, 60 metrge júgirý saıysynda Azııa oıyndarynyń jeńimpazy Olga Safronova (7.30) Portýgalııa ókili Arıalıs Gandýllaǵa (7.18) ese jiberip, kúmis júldeni qanaǵat tutty. Úshinshi orynǵa aýstralııalyq Magdalena Lınder (7.43) jaıǵasty. Uzyndyqqa sekirýde О́zbekstan sportshysy Darıa Reznıchenkoǵa teń keler sportshy tabylmady. Ol 6.32 metr nátıjemen top jardy. Qazaqstannyń dańqty sportshysy, Olımpıada chempıony Olga Rypakovanyń qyzy Anastasııa Rypakova 5.89 metrmen ekinshi, taǵy bir jerlesimiz Alına Chıstıakova (5.84) júldeli úshinshi orynǵa jaıǵasty.
Týrnırdiń eń tartysty básekesi áıelder arasynda bıiktikke sekirý saıysynda ótti. Nátıjesinde, júldeli úsh oryndy da jerlesterimiz oljalady. Nadejda Dýbovıskaıa 1.93 metrmen altyn tuǵyrdan kórinse, Nadejdadan tórt santımetr qalyp qoıǵan Krıstına Ovchınnıkova (1.89) men Elızaveta Matveeva (1.89) ekinshi jáne úshinshi oryndardy ózara bólisti.
400 metr qashyqtyqtyń úsh júldesin de Qazaqstan sportshylary ıelendi. Elına Mıhına (55.14) – birinshi, Aleksandra Zalıýbovskaıa (55.28) – ekinshi, al Krıstına Kondrashova (55.87) úshinshi orynnan kórindi.
