Spartakıadanyń úmit alaýy

Sportty damytý dırek­sııa­synyń baspasóz qyzmeti ta­ratqan málimet boıynsha, Spar­takıadaǵa respýblıkalyq mańyzy bar úsh qala (Astana, Almaty, Shymkent) men 17 ob­lystyń quramalary qatysady. Elishilik Olımpıadanyń shy­myldyǵyn bilekti balýandar túrmek. Bozkilem sheberleri 3-8 aqpan aralyǵynda Almatydaǵy Balýan Sholaq atyndaǵy sport saraıynda kúrestiń úsh túrinen kil myqtyny anyqtaıdy.

Jarystyń alǵashqy eki kúninde grek-rım balýandary 55, 60, 63, 67, 72, 77, 82, 87, 97 jáne 130 kılo salmaqtarda bel­desse, 5 aqpanda áıelder 50, 53,55, 57, 59, 62, 68, 72 jáne 76 kıloda bozkilemge shyǵady. Al 6-7 aqpan kúnderi erkin kúres sheberleri 57, 61, 65, 70, 74, 79, 86, 92, 97 jáne 125 kılo sal­maqtarda kim myqtyny anyq­taıdy.

Munda kúrestiń ár túrinen komandadaǵy sportshy sany 15-ten aspaýy qajet. Al 5 sal­maq­tyń qaısysyna 2 ba­lýan­nan qosatynyn ár komanda ózi anyqtaı alady. Jal­py­ko­man­dalyq esepke eń úzdik ná­tıje kórsetken sportshynyń je­­tis­tigi ǵana jazylady. Kúres­ten qaıta jasaqtalǵan Qazaq­stan ulttyq quramasy Spar­ta­kıa­dadan soń birden naýryz aıynda Úndistan astanasy – Nıý-De­lıde ótetin Azııa chem­pıo­­natyna daıyndyqty bastaıdy.

Bıylǵy Spartakıadanyń resmı ashylý saltanaty 30 mamyrda Taraz qalasynda uıym­dastyrylady dep josparlanǵan. Aıta keteıik, bıylǵy jarys­tar Spartakıadanyń sheshýshi, úshinshi kezeńi bolmaq. Osyǵan deıin alǵashqy kezeńde aýdan men qala quramasy anyqtaldy. Sosyn, olar ekinshi kezeńde oblys pen respýblıkalyq mańyzy bar qalalardyń quramasyna kirý úshin ózara sheberlik baıqasqan edi.

Qazaqstan sportshylary 2023 jylǵy Spartakıadada kúres­tiń úsh túrinen bólek, ten­­­­nıs, badmınton, gandbol, sem­serlesý, karate, aýyr atletıka, jeńil atletıka, gımnas­tıka, júzý, velosport, baı­dar­ka esý jáne taǵy basqa da sport túrlerinen synǵa tú­sedi. Byltyrǵy jarystyń jal­­­­py­komandalyq esebinde Almaty qalasynyń komandasy top jar­­ǵan bolsa, ekinshi oryndy Shymkent qalasy, úshin­shi oryndy Almaty oblysy ıe­len­gen-di.