«Memleket basshysy saılaýaldy baǵdarlamasynda elimizdegi aqparattyq saıasatty, jastar saıasatyn, azamatyq qoǵammen baılanys tetikterin jetildirý boıynsha naqty tapsyrmalar berip, mindetter qoıdy. Osy turǵyda óńirlik BAQ máseleleri, atap aıtqanda, oqyrmandar sany men basylym taralymyn qaıta kóbeıtý, qarjylandyrý jáne tehnıkalyq jańartý, ýaqtyly jetkizý men jergilikti BAQ ahýalyn jaqsartý baǵytynda mınıstrlik jáne jergilikti atqarýshy organdarmen birge tıimdi ári naqty sheshý joldaryn pysyqtaý qajet dep esepteımiz», dedi A.Seıdiruly.
Premer-mınıstrdiń orynbasary, sonymen birge, aımaqtyq buqaralyq aqparat quraldarynda ár óńirdiń ózindik erekshelikterin eskere otyryp, memlekettik aqparattyq saıasatty tıimdi júzege asyrý formatyn qalyptastyrý qajettigin aıtty. Oǵan qosa, otandyq medıa keńistiktiń qaýipsizdigin qamtamasyz etýge de nazar aýdardy.
«Sol úshin elimizdegi BAQ ókilderiniń kásipqoılyǵy men sapasyn odan ári arttyrý jumystaryn jalǵastyrýymyz qajet. Halyqty arzan dúnıelermen emes, paıdaly aqparatpen sýsyndatyp, rýhanı, mádenı, tanymdyq, ulttyq qundylyqtarmen baıyta bilgenimiz abzal», dedi ol.
Munan soń sóz alǵan Aqparat jáne qoǵamdyq damý mınıstri Darhan Qydyráli: «О́tken jyly óńirlerge saparlar kezinde kóptegen basylymdardyń redaksııasyna arnaıy baryp, jaı-kúıimen jaqyn tanysqan edik. Sol kezde óńirdegi ózekti máselelerdi Astanada oılasamyz dep ýáde etkenbiz. Sonyń oraıy búgin kelip otyr», dedi mınıstr.
Sonymen birge Darhan Qýandyquly óńirlik merzimdi basylymdardyń jaǵdaıyna naqty ǵylymı zertteý jasalý kerektigin, muny qazaqstandyq qoǵamdyq damý ınstıtýty jasaý kerektigin aıtty. Bul turǵyda qazir talqylanyp jatqan «mass-medıa týraly», aqparatqa qol jetkizý, aqparattyq doktrına talqylaýdan ótkenin málimdedi.
«Aımaqtaǵy basylymdardy qarjylandyrý tetigi men erejelerin qaıta qarastyryp jatyrmyz. BAQ-qa beriletin memlekettik tapsyrystyń talaptaryn jeńildetýge múddelimiz. Atap aıtqanda, jergilikti BAQ-ty qoldaý tarıfteri 2019 jyldan beri ózgermegeni belgili. Soǵan baılanysty biz tarıfterdi ulǵaıtýdy josparlap otyrmyz. Bul sharalar jobalyq tásilde óńirlik memlekettik aqparattyq tapsyrysty qalyptastyrýǵa múmkindik beredi. Sondaı-aq jergilikti BAQ-qa jańa serpin berip, oń áser etedi degen úmittemiz», dedi Darhan Qydyráli.
Aıta ketý kerek, forýmǵa elimizdiń ár óńirinen 200-den astam delegat qatysyp jatyr. Eki kún boıy túrli sessııalar, master-klasstar, taǵylymdy talqylar uıymdastyrylady.
